Lojtarët e Partizanit i futen... basketbollit
Kapiteni Alban Hoxha përgatitet në fushë me "trajner" special
Zbutja e pandemisë "COVID-19" ka bërë që përditshmëria e njerëzve, kryesisht e sportistëve, të kthehet aty ku ishte para 13 marsit, ku u vendos izolimi i popullatës. Më 18 maj futbollistët janë rikthyer në terrenet sportive, duke u stërvitur me grupin, por duke zbatuar edhe disa masa të protokollit shëndetësor të përpiluar nga instancat përkatëse. Slogani i periudhës së karantinës ka qenë: "frikë jo, kujdes po". Por kjo situatë mendohet të jetë e shkuar për të kuqtë e kryeqytetit, pasi slogani i vjetër është zëvendësuar me të riun: "frikë jo, argëtim po". Futbollistët e Partizanit po mundohen të mendojnë vetëm të tashmen dhe këtë e tregojnë edhe fotot që ka siguruar "Panorama Sport" nga aktiviteti i tyre jashtë terrenit stërvitor. Disa futbollistë të skuadrës janë parë që gjatë pasdites të frekuentojnë ambientin e Parkut të madh të kryeqytetit, madje duke mos u larguar nga aktiviteti sportiv. Disa nga futbollistët që vijnë nga trevat shqiptare jashtë vendit, si Egzon Belica, Rron Broja, Esat Mala dhe Besnik Ferati janë fokusuar nga aparati i fotoreporterit sportiv Fred Hazizllari, duke luajtur basketboll për qejf. Duke ditur se një pjesë e lojtarëve janë të akomoduar në hotelin e klubit pranë Kodrave të Liqenit, disa aktivitete sportive, si vrapime, aerobi apo lojëra me dorë i kryejnë pranë këtij ambienti.
Monotoninë e krijuar nga karantina 66-ditore futbollistët e Partizanit po mundohen ta thyejnë edhe me familjarët e tyre duke i bërë pjesë edhe të seancave stërvitore, të cilat kanë nisur në terren së bashku me grupin që nga dita e hënë. Portieri i Partizanit dhe i ekipit kombëtar në një nga seancat e para të kësaj jave është stërvitur me një "trajner" tepër special në stërvitje. Bëhet fjalë për djalin e tij të vogël, Beko, i cili ka qenë i pranishëm në seancën stërvitore të Partizanit, duke u argëtuar me babain e tij. Fotot i ka bërë publike vetë kapiteni i kuq në profilin e tij zyrtar në "Instagram".