Federata italiane: Seritë A, B dhe C do të përfundojnë rregullisht
Zhbllokohet situata në Itali, dje komunikata zyrtare nga presidenti Gravina
Këshilli i Federatës Italiane të Futbollit ka zbuluar dëshirën për të rinisur dhe për të përfunduar kampionatet e Serisë A, Serisë B dhe Serisë C. Objektivi i presidentit federal Gabriele Gravina është ai i përfundimit në fushë i të gjithë turneve dhe, vetëm në radhë të dytë, procedimi i modifikimeve të mundshme të formatit me zgjidhje emergjence. Nuk do të zhvillohen, ndërkohë, kampionatet amatore dhe ato të kategorisë femërore. Sezoni 2019-‘20 do të mbyllet zyrtarisht më 31 gusht, por turnetë duhet të përfundohen brenda datës 20. Ndërsa sezoni i ardhshëm do të nisë nga 1 shtatori. Gjithçka në pritje të një vendimi përfundimtar nga ana e qeverisë, që do të vijë më 29 maj, sipas komunikimit të ministrit Vinçenco Spadafora. Ekzekutivi ndër të tjera ka pezulluar çdo manifestim sportiv deri më 14 qershor dhe federata është përshtatur duke konfirmuar stopin së paku deri në atë datë. Për momentin, fundjava më e përshtatshme për rinisjen
shihet ajo e 20-21 qershorit, por nuk mund të përjashtohet një përshpejtim për datën 13. Pra, pas OKit për protokollit të stërvitjeve në skuadër, po studiohet edhe ai i rinisjes së kampionatit.
– Në komunikatën e gjatë të shpërndarë nga FIGC, kapitulli i dedikuar kompeticioneve
profesioniste thotë: “Në respekt të normave sportive të parashikuara nga Komiteti Ndërkombëtar Olimpik dhe Komiteti Olimpik Ndërkombëtar Italian dhe në konformitet me dispozitat e lëshuara nga FIFA dhe UEFA gjatë javëve të kaluara, Federata Italiane e Futbollit ka shprehur dëshirën për të rinisur dhe përfunduar kompeticionet kombëtare profesioniste duke fiksuar 20 gushtin si datë përfundimtare të kompeticioneve të Serisë A, B dhe C. Ndërsa për sa u përket aktiviteteve amatore, përfshi ato për kategorinë e femrave, do të pezullohen përfundimisht për këtë sezon. Megjithatë, fillimisht do të jetë kompetencë e Këshillit Federal të përcaktojë kriteret në rast se, si pasojë e emergjencës epidemiologjike nga ‘COVID-19’, kompeticionet do të pezulloheshin sërish. Në fund, në efekt të kësaj komunikate, sezoni sportiv 2020-‘21 do të nisë 1 shtatorin e ardhshëm. Ndërkohë që mbetet e fiksuar data 30 qershor për përfundimin e sezonit aktual sportiv”.
– Një nga pikat që megjithatë mbetet për t’u përcaktuar është çështja e lidhur me merkaton. Nuk dihet ende nëse kur dhe si do të zhvillohet, edhe pse federata italiane, në paragrafin e dedikuar termave të federimit për sezonin e ardhshëm (2020‘21), ka dhënë miratimin lidhur me mundësinë për të nënshkruar kontrata paraprake: “Në termat e përcaktimit të rregullave të reja të federimit për sezonin sportiv 2020‘21, që do të përcaktohen brenda disa kohësh, Këshilli ka stiluar edhe termat e depozitimit të kontratave paraprake: nga data 1 qershor deri më 31 gusht”.