Menaxheri flirton me bardhezinjtë: Kushdo do donte të luante

Zhoao Santos, menaxheri i Zhorzhinjos, vazhdon t’i lëshojë sinjale Juventusit për klientin e tij dhe gjatë një interviste për “Radio Kiss Kiss Napoli” braziliani komentoi zërat që flasin se kampionët e Italisë janë të interesuar për mesfushorin e Çelsit, i cili në Torino mund të zërë vendin e Miralem Pjaniçit, gjithnjë në rast të një transferimi të boshnjakut në Barcelonë. “Juventusi është një prej klubeve kryesore të Europës. Për të gjithë futbollistët do të ishte një kënaqësi të luanin për bardhezinjtë, - tha agjenti i regjisorit të bluve të Londrës dhe kombëtares italiane, i cili e la Napolin dy vite më parë për t’u transferuar bashkë me Sarrin në “Stamford Bridge”. - Nuk e kam dëgjuar Paratiçin, deri më sot nuk më ka telefonuar. Zhorzhinjo ka edhe tri vite kontratë me Çelsin dhe ndihet mirë në Londër. Kam lexuar për interesin e Juves përmes gazetave. Një ribashkim me Sarrin? E përsëris. Juventusi është një prej klubeve më të mëdha në panoramën futbollistike”.