Kreu i FBK-së: Liga e përbashkët, gati për edicionin 2020-2021

Nëpërmjet një videokonference është mbajtur dje takimi i parë i ekipeve teknike të Federatës Shqiptare të Basketbollit dhe FBK-së së Kosovës, të cilat kanë nisur punën për përgatitjet e dokumenteve dhe akteve normative të ligës së përbashkët, raporton gazeta kosovare "Sheshi". Në këtë takim morën pjesë edhe kryetari i FBK-së, Arben Fetahu, dhe presidenti i FSHB-së, Avni Ponari. Ndërkohë, për mediat kosovare Arben Fetahu, kreu i FBK-së, ka dhënë detaje rreth ligës: "Ideja e hershme e krijimit të një lige të përbashkët me Kosovës dhe Shqipërisë do të realizohet nga edicioni 2020-2021. Marrëveshja e bashkëpunimit dhe financimit të ligës së përbashkët do të formalizohet mes FSHB-së dhe FBK-së gjatë muajit qershor 2020, për një periudhë 4-vjeçare me mundësi vazhdimi. Qëllimi i ligës do të jetë ofrimi i një mjedisi konkurrues ndërkombëtar për ekipet e shteteve pjesëmarrëse, nxitja e konkurrencës mes klubeve dhe sigurimi i ndeshjeve ndërkombëtare. FBK dhe FSHB do të delegojnë nga katër ekipe për pjesëmarrje në ligë. Për edicionin 2020-2021 do të zhvillohen gara me sistem vajtje-ardhje, me 14 xhiro të rregullta, në të cilat secili ekip me secilin luan së paku dy ndeshje. Liga do të mbikëqyret nga Bordi Drejtues i Ligës, në të cilin federatat pjesëmarrëse i delegojnë nga 2 përfaqësues, ndërsa përfaqësuesit e federatave në këtë bord e emërojnë unanimisht anëtarin e pavarur të bordit i cili do të shërbejë edhe si Kryetar i Bordit të Ligës", është shprehur Fetahu.