Kovaç dhe Montela, kandidatë për të stërvitur kosovarin Muriqi

“Aeroplani” mund të bëjë një ulje, jo të detyruar, në Stamboll. Nëse kujtoni, kështu quhej Vinçenco Montela dhe në kryeqytetin turk do të zbarkojë vërtet. Pas largimit të Ersun Janal, skuadra e Fenerbahçes po kërkon ende të gjejë profilin e duhur për ta zëvendësuar trajnerin e shkarkuar dhe sipas të përditshmes turke “Fanatik”, mes kandidatëve ndodhet edhe Vinçenco Montela.

45-vjeçari, i cili ka stërvitur edhe Milanin, madje ishte trajneri që u ka sjellë trofeun e fundit kuqezinjve (Kupën e Italisë), është i papunë pas shkarkimit nga Fiorentina dhjetorin e kaluar. Madje, për Montelën eksperienca e mundshme jashtë Italisë nuk do të ishte e para, pas asaj te Sevija në gjysmën e sezonit të kaluar. Gjithsesi, Montela do të ketë një rival shumë të fortë për stolin e skuadrës ku aktivizohet edhe bomberi kosovar, Vedat Muriqi. Sërish sipas “Fanatik”, është Niko Kovaç ai që i është vetofruar Fenerbahçes për ta stërvitur. Tekniku kroat ndihet gati dhe shumë i motivuar për t’u rikthyer në punë, pas shkarkimit të pësuar në nëntor të 2019-ës nga Bajerni i Mynihut, pas një konflikti shumë të shpeshtë dhe të fortë me senatorët e bavarezëve.