Pavar, ylli i fshehtë i bavarezëve

Fshehurazi, në qetësi dhe pa zhurmë, Benzhamë Pavar po shndërrohet në një nga lojtarët më të pazëvendësueshëm te Bajerni. Që kur Zhoshua Kimish mori frenat e mesfushës, francezi nisi të jetë "komandanti" i mbrojtjes bavareze. Kur erdhi në sezonin e kaluar nga Shtutgarti, vëmendja e të gjithëve ishte te blerja 80-milionëshe, Lukas Hernandez. Ose te Felipe Kutinjo që sapo kishte ardhur nga Barcelona. Në të njëjtën kohë, bavarezët kishin paguar vetëm 35 milionë euro për kampionin e botës.

Pas 26 javësh mund të themi me plot gojën se ky investim për 24-vjeçarin ishte një sukses, meritat e të cilit shkojnë për Hasan Salihamixhiç. Goli i shënuar në ndeshjen me Union Berlin në fund, nuk ishte i pari me fanellën e Bajernit. Dy herë kishte shënuar ai më parë dhe 3 asiste kishte shërbyer për skuadrën kampione. Shifra të mira duke marrë në konsideratë rolin që ka në ekip. 24 ndeshje nga 26, francezi ka luajtur për 90 minuta. Ndaj Gladbahut qëndroi në stol dhe me Paderbornin mungoi për shkak kartonësh. Në të dyja këto ndeshje, bavarezët pësuan plot katër gola. Nuk është rastësi që mungesa e francezit solli një vrimë në mbrojtje. Në Champions, 24vjeçari ka luajtur në të 7-ta ndeshjet duke treguar një rendiment të qëndrueshëm.

Me 674 sprinte, francezi është lojtari i dytë në Bundesligë, pas Hakimit, që ka një shifër të tillë inkursionesh. Ylli i Borusias mban vendin e parë me 873. Edhe për sa u përket kilometrave të përshkuar, francezi mban vendin e dytë me 267, në vend të parë është Matias Cimerman i Dyseldorfit me 276. Ajo që ka rënë më shumë në sy është saktësia në pasim. Plot 89.6 për qind të pasave kanë qenë të përpiktë, duke i dhënë skuadrës një siguri në fushën e lojës. Pavar, pa dyshim mund të konsiderohet blerja më e mirë e Bajernit në këtë sezon.