Zhang: “COVID-19” nuk do të prekë Interin
Sot, ndërkohë, pritet të komunikohet një tjetër sponsor i ri
Stiven, djali i tij, i cili që nga 26 tetori i 2018-ës është presidenti i Interit, nuk është prononcuar më publikisht prej disa kohësh, që pas shpërthimit në rrjetet sociale kundër presidentit të Ligës së Serisë A, Paolo Dal Pino. Emergjenca e Koronavirusit e ka detyruar të qëndrojë në Kinë gjatë periudhës së karantinës. Tifozët zikaltër, megjithatë, ka menduar t’i qetësojë Zhang Jindong, pronari i “Suning”, grupit investitor të klubit, i cili njëkohësisht është edhe deputet i Kongresit Popullor Kombëtar të Kinës dhe ditën e djeshme ka paraqitur planin e ri të zhvillimit për të ringritur Kinën pas përfundimit të pandemisë “COVID19”. “Epidemia, - është shprehur për “Securities Times”, nuk do të ndryshojë themelet ekonomike të Kinës dhe potencialin për të arritur te rezultatet e mëdha”. Ku hyn këtu Interi? Normalisht, tani zikaltrit janë të lidhur ngushtë me Kinën, prandaj edhe tifozët interistë mbajnë gjithmonë njërin vesh pranë zhvillimeve që i përkasin vendit aziatik. “Impakti i Koronavirusit mbi Kinën është vetëm i përkohshëm, - ka vijuar Zhang. - Dhe nuk do të ndryshojë themelet e rritjes ekonomike afatgjatë. Në 2020ën, objektivi i përgjithshëm i zhvillimit të tregtisë elektronike të ‘Suning’ do të mbetet i pandryshuar dhe madje do të shtojë vazhdimisht investimet në infrastrukturë”.
PARTNERË TË RINJ – Pra, jo vetëm në politikë. “Suning” do të vazhdojë procesin e rritjes. Sipas një raportimi nga mediat italiane, grupi investitor me seli në Nankin do të vazhdojë rritjen edhe përmes ortakërive dhe së fundmi ka
takuar bordin e një kolosi të famshëm teknologjik, me qëllim për të lidhur një marrëveshje. Dhe kompania në fjalë flitet t’i përgjigjet emrit të “Samsung”. Prej kohësh po diskutohet ndërprerja e ortakërisë me “Pirelli”-n si sponsor fanelle dhe ndoshta kjo do
të jetë lëvizja e radhës për të gjetur zëvendësuesin. Vetë Interi përmes rrjeteve sociale ka komunikuar dy ditë më parë se, me rastin e 22 majit (pra, sot) për dhjetëvjeçarin e “Tripletës”, do të prezantojë pikërisht një sponsor të ri nga merkatoja kineze.