Taullahu: Kemi 3 muaj që presim derbin, festën në Lushnjë
Lushnjarët nisin sot javën e dytë stërvitore në kuadër të rifillimit të sezonit. Për “Panorama Sport”, mesfushori qendror, Ledjan Taullahu, shprehet: “Kemi mbyllur një javë stërvitje dhe gjendja është shumë e mirë. Kontakti me fushën dhe stërvitja e organizuar na kanë rikthyer në punë dhe po mendojmë për ndeshjet tona, që të jemi në formën më të mirë. Kemi derbin me Apoloninë, që kemi 3 muaj që e presim. Shpresojmë ta nisim me rezultat pozitiv, që do të na shërbente shumë për ecurinë e fazës së “play off”-it”. Derbi luhet pa praninë e publikut dhe kjo gjë është në favor të Lushnjës, por ndeshje të tilla nuk kanë kuptim pa publikun, siç pohon Taullahu: “Është fatkeqësi që ndeshja do të luhet pa tifozë. Ne luajmë për publikun, mendojmë golin dhe fitoren për të dëgjuar zërin e tifozëve, ndaj është e trishtë të luhet me shkallë bosh, por kështu erdhën rrethanat. Festën do ta bëjmë në Lushnjë. Apolonia është një kundërshtar për t’u marrë në konsideratë, me lojtarë të mirë dhe punëtorë, por besojmë se përsëri do të fitojë eksperienca jonë”, u shpreh 34vjeçari. Vitet e fundit Lushnjës i ka ecur me Apoloninë, ku në tri sezonet e fundit nuk ka asnjë humbje për verdhejeshilët në derbi. Ata kanë 4 fitore dhe 2 barazime. “Kjo është gjendja e ekipeve. Lushnja ka qenë më mirë tri-katër vitet e fundit dhe ky është një favor psikologjik. Çdo derbi ka kohën dhe veçantinë e vet, por kur ke përballë përsëri lojtarë kundërshtarë që i ke mundur, morali mbetet i lartë. Kemi edhe tri javë kohë dhe besimi në ekip është shumë i madh”, përfundoi Taullahu.