"Në Botëror luajta i dëmtuar, Van Gal më dha një shpullë"
Kompetent, inovator, fitues. Por në të njëjtën kohë një personazh me të cilin është shumë e vështirë që të biesh dakord. Luis Van Gal është një personazh 360 gradë, prandaj edhe futbollistët e tij e kanë të vështirë ta përkufizojnë në një mënyrë të vetme. Shembulli më i mirë vjen nga Robin Van Persi, i cili ka punuar me të si në kombëtaren holandeze, ashtu edhe te Mançester Junajtid. Por, siç tregon në librin "LVG, trajneri dhe personi total", marrëdhënia e tyre ka pasur ulje-ngritjet e saj.
SHPULLA
Në kombëtare, historia më absurde është ajo e ndeshjes kundër Kosta Rikës në Botërorin "Brazil 2014". Holanda shkoi deri te penalltitë dhe sulmuesi, i cili e luan kohën shtesë me kontraktime muskulore, merr edhe një shpullë në këmbim. "Ndeshja shkoi në kohën shtesë dhe unë kisha ngërçe. Luis më ulëriti: 'Të zëvendësoj', unë u ktheva dhe iu përgjigja: 'Jo, jo, janë penalltitë'. Por 20 minutat e fundit ishin fizikisht një ferr për mua. Van Galin e shikoja që ishte i tërbuar. Kur ndeshja përfundoi dhe u afruam në stol përpara penalltive, ai m'u afrua dhe më goditi. Më dha një shpullë me shuplakën e hapur dhe i nxehur më tha: 'Mos ma bëj më diçka të tillë'. Unë e pashë i tronditur dhe ai më tha vetëm: 'Tani merr veten dhe shko të shënosh penalltitë tënde'. Dhe jam i lumtur që e bëra. Por, kur e kujtoj atë skenë, ajo e përshkruan në mënyrë perfekte Luisin. Ndonjëherë të përqafon, ndonjëherë të rreh".
PËRPLASJA
Atë verë Van Gal do të transferohej në "Old Trafford". Por pas një viti bashkëjetesë te Mançester Junajtid, gjërat ndryshuan dhe Van Gal i tregon derën sulmuesit. "Ma tha në mënyrë shumë të ashpër: 'Ti je futbollisti dhe unë trajneri. Unë nuk do të iki, kështu që duhet të largohesh ti. Koha jote te Mançester Junajtidi përfundoi'. Familja ime ndihej mirë në Mançester, kështu që iu përgjigja: 'Kështu thua ti, sepse unë kam kontratë edhe për një tjetër vit'. Por ai ishte i bindur: 'Duhet të largohesh'. I kërkova të më shpjegonte se çfarë kisha bërë keq, sepse nuk kuptoja dhe ai më tha: 'Ka një dallim mes Van Galit që stërvit kombëtaren dhe atij që stërvit në një klub'. Unë i thashë se nuk do të kishim gjetur kurrë një marrëveshje, i shtrëngova dorën dhe u largova. A e bëj përgjegjës për mënyrën se si shkuan gjërat? Sigurisht, më lëndoi mua dhe familjen time".