Partizani B hedh hapin e parë, kaos me rregulloren
Ndeshjet e radhës luhen në fushë asnjanëse sipas FSHF-së, klubet s’janë dakord
Partizani B e ka kaluar me lehtësi ndeshjen e parë të "play off"-it me Sopotin. Një tregolësh në 22 minuta ka treguar forcën e të kuqve të drejtuar nga trajneri Mehmeti. Kapiteni Florjan Peqini hapi serinë e golave pas 10 minutash lojë, në të 21-ën dyfishoi Odeon Berdufi dhe pas 1 minute Tedi Cara trefishoi, duke bërë që Sopoti të mos ketë asnjë shans. Në pjesën e dytë, sulmuesi Tedi Cara shënoi edhe golin e 4-t të ndeshjes, që u ndoq edhe nga drejtuesit e ekipit të parë të Partizanit. Përveç Carës, në këtë ndeshje luajtën edhe portieri Teqja, mbrojtësi Bitri dhe sulmuesi Llanaj nga ekipi i parë. Ky është hapi i parë për Partizani B që tani duhet të ndeshet me Gramshin në raundin tjetër. Ndeshja luhet të enjten, por problemi
është ku.
POLEMIKA PËR RREGULLOREN -
Nga FSHF-ja bëhet me dije se ndeshjet e radhës të "play off"-it, Maliqi-Albtertoli në Grupin e Jugut dhe Partizani B-Gramshi në Grupin e Veriut, do të luhen ditën e enjte, në fusha asnjanëse (ende nuk janë përcaktuar). Por kjo çështje ka krijuar polemika, sepse ekipet fituese nuk janë dakord. Ndoshta është më logjik varianti që ka FSHF-ja, por rregullorja në fakt lë vend për interpretim. Maliqi ndeshet me Albpterolin dhe pretendon që këtë rival ta presë në shtëpi,
duke qenë se është pozicionuar më mirë në renditjen përfundimtare (Maliqi i dyti, Albpetroli i treti). E njëjta gjë edhe me ndeshjen tjetër, ku Partizanit B sigurisht që i leverdis të luajë në fushën e tij si ekip i vendit të tretë. Në rregulloren e FSHF-së sa i takon skemës së "play off"it
të Kategorisë së Dytë, shkruhet se ndeshjet janë teke dhe se luhen në fushën e ekipit të renditur më mirë në klasifikim, por pa u saktësuar nëse është fjala për gjithë fazën e "play off"-it, apo vetëm për ndeshjet e para. Kjo çështje pret zgjidhje për të shuar polemikat.