Dobjani: Dy faktorë e penalizuan Besën, tani jemi pa presion
Kuka e Dobjani u alternuan me njëri-tjetrin në mbrojtje të portës verdhezi gjatë dy fazave të para të kampionatit. Kjo konkurrencë u shërbeu dy portierëve për të qenë sa më efektivë. Mund të thuhet se golat që kanë pësuar nuk kanë ardhur për faj të tyre. Kavajasit i rikthehen kampionatit përballë Egnatias, takim që do të luhet javën e ardhshme në Luz. Për portierin kavajas Ilir Dobjani, situata në kampin verdhezi është krejt ndryshe nga më parë. “Nëse kemi gabuar gjatë 2 fazave të para, mendoj se kanë ndikuar 2 faktorë. I pari dhe kryesori ka qenë presioni që rëndonte mbi ne për të marrë pikët maksimale, nisur nga objektivi. I keni parë sfidat ku kemi dominuar, por nuk kemi prodhuar pikët që meritonim. Së dyti, patëm shumë mungesa, veçanërisht gjatë fazës së dytë pas ndeshjes me Lushnjën. Janë dy faktorë që ndikuan te pikët. Por, jam i bindur se me përbërjen e grupit dhe lojërat që kemi zhvilluar, ne meritonim më shumë se vendi i katërt në klasifikim. Ndryshe nga dy fazat e para, tani nuk kemi më atë presion për të arritur me çdo kusht fitore në secilën ndeshje. Kur them kështu, kam parasysh edhe ambiciet e përbërjen e rivalëve tanë si Egnatia, Tomori e Pogradeci. Do të jenë ndeshje të paparashikuara, ndaj thashë më lart se duhet të luajmë lirshëm ashtu si dimë ne të bëjmë. Tani peshon një tjetër presion dhe ai është presioni i fanellës. Po përgatitemi fort për takimin e parë ndaj Egnatias, një kundërshtar që na ka marrë 4 pikë në dy ndeshje. Besoj se deri fundjavën e ardhshme do të jenë rikuperuar futbollistët e dëmtuar, pasi mungesa e tyre na penalizoi në disa takime”, u shpreh Dobjani për “Panorama Sport”. Feriz Ferizaj