“Poker” kontratash, ja firmat që mbajnë peng të ardhmen kuqezi
Pas pushimit për ekipet kombëtare, edhe te Milani është koha për të menduar për kampionatin. E tashmja thotë Sampdoria në prag të Pashkëve, por në klub një nga temat më të nxehta dy muaj të plotë nga fundi i sezonit janë rinovimet e lojtarëve si: Donaruma së pari, pastaj Çalhanoglu dhe Kesi. Me Ibrahimoviçin, situatë e veçantë në sfond. Momenti është vendimtar dhe Maldini me partnerët e tij duhet të gjejnë ekuilibrin e duhur, në mënyrë që të mos rrezikojnë të humbin një kapital të rëndësishëm pa ndonjë kosto ose me një çmim skontoje. Situata ka filluar të jetë mjaft e mjegullt e madje edhe optimizmi që nuk ka munguar asnjëherë në zyrat e “Casa Milan” po i përulet disi njëfarë nervozizmi. Bisedimet me menaxherët e lojtarëve të ndryshëm vijojnë prej muajsh të tërë, por një kornizë nuk është përcaktuar ende, ndaj le i marrim situatat me rend.
DONARUMA - Situata më e ashpër ka të bëjë me Xhanluixhi Donarumën. Portieri i ekipit kombëtar të lindur në vitin 1999 ka një kontratë që do të skadojë në qershor dhe të gjitha propozimet e bëra nga drejtuesit kuqezi për Mino Raiola deri më tani, kanë rënë në vesh të shurdhër. Në tavolinë ka tetë milionë euro në vit, një ofertë e konsideruar shumë e ulët nga agjenti, i cili përkundrazi kërkon të paktën 10 milionë euro plus bonuse dhe praninë e një klauzole lirimi. Situata është bllokuar dhe gjithçka do të varet nga vullneti i vetë Xhixhos, i cili gjithmonë i është betuar për dashuri Milanit. Për momentin nuk ka pretendentë jashtë Italie që janë të gatshëm të plotësojnë kërkesat e Raiolas, por me një lëvizje të drejtpërdrejtë nga lojtari, situata mund të zhbllokohet ndërkohë që vetë klubi po vlerëson alternativat si Golini. Menja apo ndonjë tjetër.
PEZULL - Situatë e mbetur pezull edhe në lidhje me Hakan Çalhanoglunë. Edhe me përfaqësuesit e turkut, bisedimet për rinovimin kanë vazhduar me muaj, por pa ndonjë marrëveshje. Diferenca është gjithmonë e lidhur me kërkesën për rrogën e numrit 10 të cilën krerët e “Djallit” e gjykojnë shumë të lartë. Për Kesin ka më pak nxitim duke pasur parasysh që afrikanit ka ende një vit në kontratën e tij, por sirenat nga jashtë po tërheqin vëmendjen e lojtarit i cili po vijon të jetë thelbësor në tabelën taktike të Piolit si kurrë më parë këtë sezon. Menaxherët e lojtarit kërkuan 5 milionë euro në sezon për të rinovuar, një përpjekje që Milani do të duhet të bëjë nëse dëshiron ta arrijë akordin me mesfushorin.
IBRA MBYLL DISKUTIMET - Më në fund, diskutimi për Zlatan Ibrahimoviçin, siç dihet, është i ndryshëm. Nuk do të kishte pengesa për të vazhduar së bashku, të paktën jo në nivel menaxherial. Sidoqoftë, palët kanë rënë dakord gjithmonë të ulen rreth një tavoline për të biseduar në lidhje me të vetëm në fund të sezonit. Përflitet për një kontratë vjetore me 5 milionë euro plus bonuse të lidhura me paraqitjet duke parë që 39-vjeçari ka luajtur vetëm gjysmën e lajmeve në këtë edicion të sezonit të Milanit.