Qerimaj larg medaljeve në Europian, zhgënjen Godelli
Peqinasi nuk klasifikohet në dygarësh, sot radha për Shorajn
Shqipëria vijon konkurrimin në Ka mpionatin Europian të Peshëngritjes që po mbahet në Rusi. Por, nëse në dy daljet e para me Evangjelia Velin dhe Briken Caljen Kombëtarja jonë siguroi medalje, dita e djeshme nuk i justifikoi pritshmëritë për kuqezinjtë. Erkand Qermiaj dhe Daniel Godelli, të cilët garuan në kategorinë e peshave 81 kg, nuk mundën që t’i afroheshin podiumit. Por, ndërsa shkodrani zhvilloi një garë të kënaqshme, peqinasi nuk mundi të klasifikohej në dygarësh, pasi u tërhoq për shkak të një dëmtimi. Kështu, Qerimaj e përfundoi Europianin në vendin e gashtë në shkëputje, në të 10-in në shtytje për ta mbyllur dygarësh i 9-ti. Ndërsa Godelli pasi dështoi në provën e tij të parë, në të dytën pësoi një dëmtim duke i dhënë fund aventurës së tij në Moskë.
GARA - Erkand Qerimaj garoi në baterinë B të peshave 81 kg. Shkodrani e filloi mirë stilin e shkëputjes, teksa kaloi me sukses provën e parë me 150 kg. Në të dytën ia doli të ngrinte 154 kg, ndërsa e mbylli shkëputjen me 156 kg të ngritura. Me këtë rezultat 32vjeçari u rendit në vend të gjashtë në Europë. Në stilin e shtytjes, Qerimaj kaloi provën e parë më 180 kg, por më pas dështoi në dy tentativat e tjera respektivisht me 184 dhe 185 kg, duke e mbyllur shkëputjen në vend të dhjetë. Kështu, me 336 kg gjithsej në dygarësh, shkodrani renditet i nënti në
Kampionatin Europian. Një rezultat i kënaqshëm ky duke parë që shtangisti vinte pas një dëmtimi në bërryl të pësuar disa javë më parë. Vetë Qerimaj, me anë të një postimi në rrjetet sociale, e konsideroi në paraqitjen e tij të suksesshme. Ndërkohë, për Daniel Godellin ishte një ditë për t’u harruar. 29-vjeçari peqinas dështoi në provën e parë me 152 kg, ashtu sikurse në të dytën, për t’u tërhequr më pas nga gara i dëmtuar, duke mos mundur që të klasifikohet dot për në dygarësh. I fundit që ka mbetur për të garuar nga sportistët kuqezinj në Moskë është Krenar Shoraj. Vlonjati do të konkurrojë ditën e sotme në baterinë A të peshave 89 kg, duke shpresuar që t’i shtojë një tjetër medalje Shqipërisë, edhe pse nuk do të jetë aspak e lehtë pasi bëhet fjalë për një event ku rivaliteti është shumë i lartë, pasi garojnë më të mirët e kontinentit.