Presidenti Meta përshëndet triumfin e Briken Caljes
Briken Calja regjistroi një tjetër paraqitje historike, teksa vijon ta ngjisë flamurin tonë kombëtar në podiumet e aktiviteteve madhore ndërkombëtare. Peshëngritësi shtërmenas i dhuroi Shqipërisë një medalje argjendi dhe një bronzi në Kampionatin Europian. Medaljet mund të ishin tri, por Calja ishte i pafat pasi për vetëm 100 gram peshë trupore humbi bronzin në stilin shkëputjes. Megjithatë për vite me radhë peshëngritësi kuqezi është një garanci për medalje në Europiane apo Botërore. Edhe pse nuk mundi të koleksiononte medalje të artë, rezultati i shënuar në Kampionatin Europian mbetet një arritje e shkëlqyer për peshëngritësin 3vjeçar dhe për vendin tonë, pasi bëhet fjalë për një event ku marrin pjesë shtangistët më të mirë të kontinentit, që përfaqësojnë shtete me infrastrukturë dhe investime shumë herë më të mira se Shqipëria. Suksesin fantastik të Briken Caljes e ka përshëndetur edhe presidenti të Republikës, Ilir Meta, i cili nëpërmjet një postimi në faqen zyrtare, i ka shprehur mirënjohje të thellë Caljes për medaljet e fituar në Europian. “Duhet t’u jemi përherë mirënjohës dhe mbështetës të gjithë sportistëve elitarë kuqezinj si Brikeni, të cilët e lartësojnë flamurin dhe imazhin e Shqipërisë, aty ku faqezinjtë e politikës sonë nuk kanë arritur dot”, shkruan ndër të tjera presidenti Meta, i cili siç dihet në rininë e tij është marrë me sportin e peshëngritjes. Ja postimi i plotë e bërë nga kreu i shtetit ditën e djeshme për arritjen historike të Caljes: “Kënaqësi e veçantë të uroja nëpërmjet një bisede telefonike kampionin kuqezi, Briken Calja për fitoren e medaljes së argjendit në shtytje dhe të bronzit në dygarësh, në Kampionatin Europian të Peshëngritjes në Moskë. Një tjetër sukses i merituar personal dhe një ngjarje e madhe për peshëngritjen tonë, që për të pestin vit radhazi siguron medalje në garat ndërkombëtare konkurruese, falë talentit, punës e përkushtimit të kampionit Calja dhe trajnerit të tij të madh Gerald Toska. Sportistë të kalibrit të tij na lumturojnë, na nderojnë dhe na bëjnë krenarë të gjithëve. Ata janë jo vetëm model frymëzimi për gjeneratat e reja, por edhe ambasadorët tanë më të mirë në botë. Duhet t’u jemi përherë mirënjohës dhe mbështetës të gjithë sportistëve elitarë kuqezinj si Brikeni, të cilët e lartësojnë flamurin dhe imazhin e Shqipërisë, aty ku faqezinjtë e politikës sonë nuk kanë arritur dot. Jam i bindur se sukseset më të mëdha të kampionit tonë të peshëngritjes do të jenë ato të radhës”, shkruan presidenti Meta.