Pep blindon De Bryjnen deri në 2025

Belgu: Jam i lumtur. Siti është shtëpia ime dhe klubi është ndërtuar për të fituar

Mançester Siti blin don yllin e tij. “Qytetarët” njoftuan mëngjesin e së mërkurës rinovimin e kontratës së Kevin de Bryjnes: në skadencë në vitin 2023, marrëveshja me mesfushorin belg u zgjat edhe me dy sezone të tjera, deri në qershor 2025. Dhe kështu 29vjeçari, i transferuar në Mançester në vitin 2015, pasi luajti për Genkun, Verder Bremenin, Çelsit dhe Volfsburgun, mund ta mbyllë karrierën në “Etihad”. Me Sitin ai ka fituar 2 tituj kampion, 1 Kupë FA, 4 Kupa Lige dhe 1 Superkupë Anglie.

DETAJET – De Bryjne, i cili tregoi edhe një herë tjetër se sa i rëndësishëm është për skuadrën e Guardiolës, me një gol personal dhe frymëzuesin e golit të fitores në 90’ ndaj Dortmundit të martën, do të paguhet nga kontrata e re më shumë se kontrata e tij e shkuar prej 300 mijë paundësh në javë pa bonuse, duke u bërë një prej lojtarëve më të paguar në Angli. Siti mund të marrë frymë lirisht pas një ngërçi të

vogël me firmën, duke qenë se futbollisti kërkonte garanci në planin për të fituar Champions-in e parë. Belgu do të mbushë një dekadë në “Etihad” nëse respektohet deri në fund kontrata e re, duke u barazuar me legjendat e tjera të klubit, Serxho Agueron, David

Silvën dhe Vinsent Kompaninë. “Nuk mund të isha më i lumtur”, ishin fjalët e para të lojtarit pas firmës. “Që kur i jam bashkuar Sitit në vitin 2015, jam ndier në shtëpi. I dua tifozët. Familja ime ndihet shumë mirë këtu në Mançester dhe loja ime është përmirësuar shumë.

Ky klub është ndërtuar për të fituar. Ai më ofron gjithçka që më duhet për të maksimalizuar paraqitjen time, kështu që firma në këtë kontrate ishte një vendim pa hezitim. Po luaj futbollin më të mirë të karrierës time dhe sinqerisht ndiej se kam për të treguar më shumë. Pep dhe unë e shohim futbollin në të njëjtën mënyrë. Duke pasur një marrëdhënie të tillë me trajnerin është shumë e rëndësishme për mua, sepse objektivat tona janë të njëjtat dhe ne duam të arrijmë të njëjtat synime. Tani fokusi im është që të mbyllim këtë sezon me sukses”.