Skënderbeu merr një pikë, bardheblutë i largohen kreut
Skënderbeu vijon të tregojë grintën e duhur në javët e fundit të kampionatit, duke arritur të marrë një pikë me vlera në Korçë përballë kampionëve në fuqi. Bardhekuqtë ndalën kampionët në fuqi të Kategorisë Superiore në një barazim pa gola, duke konfirmuar momentin e mirë që po kalojnë, me skuadrën e Memellit që mori pikën e 10-të në 5 ndeshjet e fundit. Një pikë kjo që rrit ndjeshëm shanset për të arritur objektivin e sezonit, mbijetesën. Barazimi nuk është një rezultat i mirë për krahun tjetër. Bardheblutë mund të humbasin terren në garën për Europën dhe titullin, pasi shohin që kundërshtarët largohen gjithnjë e më shumë.
NDESHJA - Në Korçë sfida nisi me Tiranën më kërkuese. Tentativa e parë në drejtim të portës së korçarëve nga ana e kampionëve në fuqi erdhi në minutën e 9-të me Marsel Ismajlgecin nga distanca pas një aksioni të gjatë të bardhebluve, por portieri i Skënderbeut u shfaq në lartësinë e duhur. Në minutën e 36-të rasti i parë për Skënderbeun në këtë sfidë, por goditja me kokë e mbrojtësit kosovar Vitija shkoi mbi traversë. E rriti shumë presionin skuadra e Memellit, teksa në minutën e 40-të u desh ndërhyrja e Visar Bekajt për të evituar golin e korçarëve me Jorgo Meksin. Goli ishte në ajër dhe erdhi pak sekonda më vonë me Uerdi Marën që krosoi saktë për Elvi Berishën, i cili nuk fali në goditjen e tij me kokë, por gjithçka u anulua nga gjyqtari anësor për një pozicion jashtë loje. Me shifrat e bardha 0-0 mbyllet fraksioni i parë i lojës.
Pjesa e dytë nisi me Tiranën disi më mirë. Në të 60-ën minutë provoi Erjon Hoxhallari nga distanca, por goditja e mbrojtësit nuk gjeti portën e Dajsinanit. Në minutën e 69-të një tjetër rast, i pari për Skënderbeun në pjesën e dytë, por goditja e Vangjel Zguros nga distanca ishte e lehtë dhe u prit pa vështirësi nga Bekaj. Katër minuta më vonë erdhi kundërpërgjigjja e Tiranës me Augstin Torasën që provoi të realizonte një gol kryevepër, por parabola e tij nga jashtë zone shkoi mbi traun e portës me Dajsinanin e mposhtur. Minutat në vazhdim folën pothuajse të gjitha për Tiranën që e përqendroi lojën në gjysmëfushën e Skënderbeut, por rastet e pastra për shënim munguan me dy skuadrat që ndanë nga një pikë, barazim që u shkoi më shumë përshtat korçarëve të cilët e ngushtuan në vetëm 3 pikë diferencën me Bylisin e vendit të 8-të dhe kanë shanse reale për të kapur zonën “play out”.