Lushnja zgjohet në Peqin, Elbasani është i pashpresë
Shtylla nuk mjafton, verdheblutë thuajse të rënë
Lushnja “zgjohet” në Peqin. Verdhejeshilët mundin Elbasanin dhe ngjiten në vendin e parë të zonës “play out”. Përballë verdhebluve vuajtën jo pak dhe kjo duket qartë nga minuta kur erdhi goli. U desh që të futej nga stoli Vilfor Hysa, që të besuarit e Ilir Gjylës të merrnin një trepikësh gati çerekore para fundit. Elbasanasit janë përfundimisht të pashpresë, ndërsa pësuan humbjen numër 15 për këtë sezon. Ata kanë marrë rrugën pa kthim, pasi thuajse i kanë mbyllur llogaritë me Kategorinë e Parë.
NDESHJA - Takimi ka nisur pa shumë grintë. Të dyja ekipet kanë menduar më shumë të qarkullojnë topin dhe të fitojnë terren. Duhej pritur minuta e 27-të, që të regjistrohej rasti i parë. E megjithatë, Qoshku nuk ka shënjestër. Pesë minuta më pas provon Bani, por ajo gjuajtje me kokë kalon vetëm ngjitur me shtyllën pingule. Vendësit zhvillojnë volum loje dhe aksione të rrjedhshme, por mungon finalizimi. Tri minuta nga fundi i pjesës së parë, Gega bën një ndërhyrje të guximshme duke ia larguar topin nga këmbët Xekës, që humbet kështu një rast ideal për të shënuar. Në pjesën e dytë, lushnjarët duken më kërkues dhe miqtë shtojnë presionin përballë një kundërshtari që duhet thënë se vuan shumë edhe aspektin psikologjik të renditjes. Megjithatë, janë verdheblutë që për pak sa nuk shënojnë. Kita driblon
Musakun në të 66-ën dhe gjuan, por shtylla pingule i mohon golin. Pas këtij momenti, janë verdhejeshilët më kërkues. Trajneri Ilir Gjyla fut në fushë një sulmues me përvojë si Vilfor Hysa dhe kjo lëvizje e nderon. Ishte pikërisht ky i fundit që arrin të zhbllokojë
rezultatin pas një inkursioni personal nga krahu i djathtë. Ai arrin të tregojë klasin e tij me një goditje diagonale në minutën e 74-t. Goli i dha tjetër ritëm skuadrës mike që kërkon të vulosë rezultatin, ndërsa verdheblutë nuk kanë forcën e duhur për të reaguar.