Hakmerret Junajtidi, Murinjo humbet trenin “Champions”
Arsenali fiton me Shefilldin, mban gjallë shpresat
shtë një javë që mund ta ketë bërë akoma më tërheqëse luftën për zonën Champions, në Angli. Me Liverpulin dhe Çelsin fitimtarë të shtunën, suksesin e Uest Hemit ndaj Lestërit 3-2 dhe humbjen e Totenhemit në shtëpi kundër Mançester Junajtidit, ndoshta ky ishte edhe treni i fundit i humbur nga Zhoze Murinjo. “Spërsat” e tij përmbysen nga një Mançester Junajtid superior, shumë i motivuar pas asaj humbjeje 6-1 në “Old Trafford” në fazën e parë. Me rezultatin 0-0, “Djajve” iu anulua një gol për një goditje në fytyrë të Mektominejt ndaj Sonit: ishte një episod që ndihmoi Totenhemin për ta përmbysur situatën, duke kaluar në avantazh pikërisht me Sonin. Por, me Pogbanë, Fernandeshin dhe Kavanin e frymëzuar, miqtë përmbysin gjithçka në pjesën e dytë. Golat e Fredit, Kavanit dhe Grinudit në shtesë dënojnë Totenhemin që e shikon Championsin gjithnjë e më larg. Me 21 pikë të mbetura në garë dhe kaq shumë skuadra që luftojnë, do jetë i vështirë rikuperimi i 6 pikëve ndaj Uest Hemit, aktualisht vendi i katërt në klasifikim, ndërkohë që në mes janë edhe Çelsi dhe Liverpuli. Junajtid mund të thuhet se ka blinduar vendin e dytë: +7 nga Lestëri, skuadra e Solskjaerit konfirmohet forcë e dytë këtë kampionat.
NDESHJA – Rasti i parë i Junajtidit vjen në minutën e 17të, por Daier mbyll mirë Rashfordin. Kavani feston në 35’, pas një asisti gjenial të Pogbasë, por një dorë e zgjatur nga Mektominej në fytyrën e Sonit në nisje të aksionit, detyron arbitrin ta anulojë me VAR. Kalojnë 5 minuta dhe Totenhemi feston: dialog i shkëlqyer në shpejtësi të lartë Kejnlukas dhe Son kompleton veprën me një të majtë që nuk arrihet nga Henderson. Në pjesën e dytë, Junajtid është një uragan. Loris i thotë “jo” Mektominejt, por dorëzohet në 57’, kur ai pret një goditje të Kavanit, por jo tentativën pasardhëse të Fredit. Solskjaer provon Grinudin në vend të Rashfordit dhe është lëvizje fituese. Sulmuesi i ri shërben krosimin për zhytjen me kokë të Kavanit në 79’ dhe në shtesë firmos edhe golin e tretë. Murinjo humbet për herë të parë në karrierë 10 ndeshje në një kampionat.
ARSENALI – Dy gola fantastikë të Lakazetit në minutën e 33-të dhe 85’ dhe një gol i Martinelit në pjesën e dytë, i mjaftuan Arsenalit të fitojë në fushën e Shefilld Junajtidit, skuadrës së fundit në klasifikim. “Topçinjtë” ngjiten në kuotën e 45 pikëve, -9 nga Çelsi i vendit të pestë dhe mbajnë ende shpresë për një vend në Europë, edhe pse shanset janë thuajse minimale. Shpresa e tyre e vetme e vërtetë mbetet nga Liga e Europës, ku ata do kërkojnë të presin biletën në gjysmëfinale të enjten në Pragë.