Siti skuadra më e shtrenjtë në botë, Guardiola, 2.1 miliardë paund në 5 vite
“Qytetarët” kanë rritur shpenzimet që kur Pep u ul në stol
Mançester Siti kishte faturën më të shtrenjtë të rrogave në historinë e futbollit anglez gjatë sezonit 2019-‘20 (351.4 milionë paund) dhe me shumë mundësi do ta thyejë atë edhe gjatë sezonit të pandemisë 2020-‘21, për shkak të bonuseve të lojtarëve në rast triumfi në Premier Ligë dhe ndoshta edhe në Champions. Skuadra e Pep Guardiolës, e cila është në garë për të fituar secilin nga katër trofetë këtë sezon, lufton gjithashtu edhe në gjysmëfinalen e Kupës FA dhe finalen e Kupës së Ligës kundër Totenhemit më 25 prill, edhe pse bonuset në rast triumfi në këto kompeticione do të ishin modeste. Në sezonin përpara se Guardiola të vinte
STERLING, SI DE BRYJNE
në “Etihad”, fatura e rrogave ishte 197.6 mln paund, por kërceu me 23.4% në sezonin e tij të parë në stol dhe prej atëherë është rritur në mënyrë të konsiderueshme. Në fund të këtij sezoni, shpenzimet për rrogat do të arrijnë gati dyfishin që kur Pep u ul në stol, duke shkuar në total 1.545 miliardë paund në mbi 5 vite. Dhe po t’u shtosh edhe 579 milionë paundët e shpenzuara në merkato, atëherë Siti ka investuar më shumë se 2.1 miliardë paund deri tani për transferimet dhe rrogat e lojtarëve gjatë drejtimit të trajnerit spanjoll. Këto shpenzime janë përkthyer në dy tituj kampion në 4 vitet e fundit, plus 3 Kupa Lige, 1 Kupë FA dhe ndoshta edhe një “poker” trofesh këtë sezon. Siti ka gjithashtu edhe skuadrën më të shtrenjtë në botë, ku sipas një raporti të Observatorit të Futbollit në Zvicër, CIES, ajo sot kushton 1.036 miliardë euro (900 milionë paund kartonët e lojtarëve aktualë). GUARDIOLA – Pep bëri 7 ndryshime në formacion nga fitorja me Dortmundin në Champions mesjavën e shkuar përballë Lidsit të shtunën, ndërsa skuadra e Marselo Bielsës fitoi 2-1 edhe me 10 vetë, duke shtyrë festën e titullit për “Qytetarët”: “Kur ti fiton, je një gjeni. Kur ti humbet... Por, unë nuk kam asnjë pendesë për të gjithë lojtarët që luajtën. Të gjithë ishin fantastikë: Natan, Benxhi... Kur ti humbet një ndeshje kupton se sa e vështirë është të bësh atë që kemi bërë deri tani, duke fituar 27 ndeshje nga 28. Katër takimet e ardhshme janë si finale, në Champions, në Kupën FA dhe finalja e Kupës së Ligës”.