Zidan lëshon alarmin: Ekipi fizikisht është në... limite

Trajneri: Arbitri nuk na ndihmoi, Benzema ka klas

Zinedin Zidan është shumë i lumtur për fitoren që arriti Reali i Madridit kundër Barcelonës, por jep alarmin për gjendjen fizike të skuadrës. Ai thotë se ekipi ka shpenzuar shumë energji dhe tashmë është në limite. Francezi kundërshton Kumanin për polemikat ndaj arbitrit.

NDESHJA - “Sigurisht që jam i lumtur. E nisëm mjaft mirë dhe morëm një fitore të merituar. Kishim shumë raste për të shënuar golin e tretë”.

KUMAN - “Secili ka mendimin e tij. Unë mendoj se arbitri nuk vërshëlleu penallti sepse nuk ishte. E rëndësishme për mua është ajo që bëmë në fushën e lojës. Pastaj kishte edhe momente ku vuajtëm, por Barcelona është një skuadër e madhe. Në fund të fundit nuk mund të thuash që këtë ndeshje e vendosi arbitri”.

PLANI - “Unë aktivizova një mesfushor më shumë, por e dija që Fede mund të depërtonte shpesh në zonën kundërshtare dhe këtë e bëri në golin e parë. Është shumë i shpejtë dhe luan mirë mes linjave”. BENZEMA - “Ka shumë kualitet dhe talent. Karim është i jashtëzakonshëm dhe gëzohem për të”. ECURIA - “Unë jam i lumtur për lojtarët. Kemi pasur shumë ndryshime dhe zëvendësime si Mariano, Odriozola, Isko, Marselo. Të gjithë janë të përfshirë dhe duan të luajnë. Kjo është diçka pozitive për skuadrën. Kemi 13 ndeshje pa humbje, por ende nuk kemi fituar asgjë”. SUKSESI - “Jemi të gjithë bashkë këtu dhe unë nuk i mbaj meritat e suksesit për vete. Kemi fituar bashkë”.

DËMTIMET - “Është e qartë që jemi në limite në aspektin fizik. Ishte një ndeshje shumë e lodhshme. Vaskez ka marrë një goditje të fortë”.

NAÇO - “Është një lojtar që e njeh mirë Realin. Ai është gati të luajë atëherë kur duhet. Ka bërë mirë në këto ndeshje. Të gjithë janë të përfshirë dhe kjo është e rëndësishme”.