11 fitore radhazi, Konte: Do t’i “groposja” të gjithë
Zikaltrit në krye, mbajnë distancën ndaj Milanit
As Kaljari i 4 ish-ëve dhe i një super Vikar io nuk ka arritur të ndalë vrullin e Interit. Fitorja e njëmbëdhjetë radhazi u regjistrua në fund falë golit të "xholit" Darmian. Zikaltrit kryesues i përgjigjen kështu Milanit fitues të shtunën në Parma dhe rikthehen në kuotën +11 pikë distancë. Sardët në krahun tjetër bien 5 nga Torinoja, i katërti nga fundi dhe me një ndeshje më pak, pavarësisht paraqitjes krenare dhe provës pozitive të debutuesit Vikario, i cili në portë zëvendësoi Kranjon (pozitiv me COVID).
INTER I LEHTË - Konte vendosi të aktivizojë Sensin (e fundit si titullar me zikaltrit më 30 shtator me Beneventon) për të skualifikuarin Barela dhe në të djathtë preferoi Darmianin në vend të Hakimit. Në sulm, me Lukakun luajti Sançez, i cili fitoi balotazhin me Lautaron. Me mesfushën më krijuese, por edhe më të lehtë të muajve të fundit, Konte mori rrezikun sepse përpara kishte muskujt e Marinit, Naingolanit dhe Dankanit. Jo rastësisht në fillim zikaltrit e patën të vështirë të krijonin lojë dhe kur në të 10-ën Eriksen tentoi portën, Vikario u përgjigj prezent me një fluturim të bukur. Pas 15 minutash Interi fitoi terren, edhe pse skema e Sempliçit faktikisht ishte një 5-3-2 dhe anësorët e kanë të vështirë të përcjellin aksionin. Në të 18ën, i asistuar nga Lukaku shënon Sançez, por ishte në pozicion jashtë loje. Në hapësira kaq të ngushta nevojitej një driblues dhe ata që u përpoqën më shumë ishin Sensi dhe Vesino. Më vertikal Eriksen, i cili kombinoi bukur me Darmianin, te krosimi i të cilit megjithatë Lukaku nuk arriti të devijonte. Rasti i parë i Kaljarit u regjistrua në të 39-ën, me një goditje të Naingolanit që e detyroi Handanoviçin për një ndërhyrje më të vështirë nga se u duk. E VENDOS DARMIAN Asnjë ndryshim në pushim dhe menjëherë Vikario protagonist në një diagonale të Sensit. Kaljari duroi, atëherë Interi e tentoi nga ajri, por Shkriniar te korneri i Eriksenit nuk arriti të prekte topin disa hapa larg portës. Faktikisht, 20 lojtarët në lëvizje manovrojnë përpara zonës së Vikarios, i kujdesshëm, por edhe i shpëtuar nga traversa në të 69-ën, te goditja me kokë e De Vrajit. Kur po mendohej gjysmëhapi i radhës, Interi kaloi në avantazh në të 77ën me një veprim të bukur të Hakimit të porsaaktivizuar, i cili i shërbeu një asist perfekt Darmianit të cilit i duhej vetëm të shtynte topin në rrjetë me të majtën. Në fundin e ndeshjes korniza u përmbys: ishin kryesuesit që nuk arrinin të dilnin nga gjysmëfusha dhe rrezikuan shumë me sulmet e vazhdueshme të miqve. Bravo Naingolan me shokë, por perfeksionisti Konte do të ketë shpjegime për t'u kërkuar të tijve për një tjetër shpërqendrim final.