Dinamo përmbys Korabin, Egnatia nis arratinë
Dibranëve nuk u mjafton Marku, Dida lë në baltë ekipin pas sherrit
Dinamo përmbys Korabin. Kryeq ytetasit morën një fitore për infarkt në fund dhe tashmë janë të dytët në renditje. Xhixhiua dhe Uelber zhvlerësuan golin e Markut, duke u dhënë një trepikësh të çmuar bluve. Ka qenë një ndeshje e bukur ajo në Peshkopi, ku nuk mungoi edhe tensioni. Pas një pjese të parë të balancuar, e dyta u bë flakë dhe sidomos çerekorëshi i fundit. Një grusht i Bekim Didës në zonë ndaj Mustafa Xhixhiuas solli direkt të kuq dhe me një lojtar më shumë të besuarit e Olsi Ukut kthyen edhe rezultatin.
NDESHJA - Korabi e nis me vrull dhe pa kaluar 2 minuta është Skuka që kërkon golin, e megjithatë Bakaj është i pakalueshëm. Në të 15-ën zgjohen miqtë. E administrojnë mirë lojën dhe vizitojnë shesh portën e Mëhidrit. Gjithsesi, kjo pjesë e parë mbyllet me rrjeta të paprekura. E dyta nis mirë për vendësit. I përhershmi Skuka merr një inkursion nga e majta, por në fund pengohet nga një mbrojtës mik. Goditje dënimi që realizohet nga Mziu, po mbrojtja blu largon topin nga zona. Insistimi i vendësve gjen rezultat në të 58-ën. Mziu harkon një top perfekt për T.markun dhe sulmuesi nuk e pati të vështirë ta shtynte në rrjetë dhe 10.
Festojnë futbollistët, por nuk mungon edhe një incident mes Fehmi Mziut dhe Ermal Barushit, aq sa kryesori detyrohet që t’i japë të kuq administratorit të dibranëve. Kur këta të fundit kërkonin golin e sigurisë, është shtylla që ia mohon në të 67-ën. Në të 74-ën ka një tjetër incident, çka ia bën “malore” Korabit. Dida godet me bërryl Xhixhiuan dhe aty nis sherr mes ekipeve. Kryesori i tregon të kuqin qendërmbrojtësit dhe rrjedhimisht vendësit mbeten me 10
futbollistë. Dinamovitët shfrytëzojnë superioritetin numerik dhe në të 82-ën barazojnë gjithçka. Da Silva harkon një top në shtyllën e dytë dhe Xhixhiua me kokë nuk fal për 1 me 1. Kërkojnë të kundërpërgjigjen vendësit, por janë të pafuqishëm. Atë që nuk e bëjnë dot dibranët, e realizojnë miqtë një minutë para përfundimit të krejt takimit. Është sërish Da Silva që shërben nga i njëjti pozicion dhe këtë herë gjen Uelberin në zonë, që me kokë është i pagabueshëm dhe 1 me 2.