Si Sauthgejt u preu krahët gjermanëve dhe triumfoi
Sekreti i “Pancerave” u zbulua në ndeshjen më vendimtare
Ishte një ndeshje ner vash, një ndeshje klasi dhe një gabim i vogël do të vendoste gjithçka. Garet Sauthgejt dhe Joakim Lëv e dinin këtë gjë dhe punuan në fshehtësi për të përgatitur skuadrat e tyre. Të dy me surpriza në formacionin e parë. Foden nisi nga stoli për anglezët të cilët iu përgjigjën skemës së gjermanëve me një mbrojtje me tre. Në krahun tjetër Lëv hodhi nga minuta e parë Timo Vernerin duke lënë në stol Gnabrinë. Pjesa tjetër nuk ndryshoi, me përjashtim të Goreckës i cili luajti për Gyndoan.
KURTHI
Trajneri anglez ishte i vetëdijshëm se forca e gjermanëve do të vinte nga korsitë anësore, aty ku Gësens dhe Kimish do të ishin krahët e avionit gjerman. Sauthgejt u përgjigj me Shou dhe Tripier të cilët do të mbulonin respektivisht Kimish dhe Gësens. Teksa Joshua u mundua të krijonte diçka nga krahu i djathtë, Gësens ishte totalisht jashtë loje duke mos kryer asnjë manovër sulmuese ndaj anglezëve. Në foton e ilustruar më poshtë do të shikoni dhe efektshmërinë që Gësens kishte në sfidën e fundit, krahasuar me ato ndaj Francës, Portugalisë dhe Hungarisë. Ndërkohë, edhe veprimtaria e dy lojtarëve në fushë ishte e paktë dhe nëse diçka ndodhte, atëherë ishte vetëm në mbrojtje dhe mesfushë dhe shumë pak në sulm. Bllokimi i këtyre dy lojtarëve bëri që gjermanët të paralizoheshin dhe humbnin aksionet rrjedhëse dhe duke u bërë shumë të lexueshëm për kundërshtarin i cili më pas e kishte të lehtë për t’i ndalur.
Rasti i vetëm ku mbrojtja angleze u kap e papërgatitur ishte ai i Tomas Mylerit. Mesfushori gjerman u pa papritur përballë portierit anglez, edhe pse kjo më shumë erdhi për një top të humbur nga Sterlingut në mesin e fushës duke u bërë një dhuratë “Pancerave”.
Mesfusha gjermane furnizoi me shumë pak topa sulmin, kjo pasi ajo vetë e kishte të vështirë të krijonte aksione e bllokuar nga të dy krahët. Timo Verner ishte një bast i humbur i trajnerit Lëv që zgjodhi të eksperimentonte në një ndeshje të rëndësishme
si ajo ndaj Anglisë në shtëpinë e këtyre të fundit. Ylli i Çelsit e kishte të vështirë i vetëm të gjente hapësirat e duhura në zonën e anglezëve të cilët e njohin mirë lojën e tij. Gnabri do të kishte qenë zgjedhja më e mirë të martën pasdite për sulmin gjerman.
Sulmuesi i Bajernit është më efikas si numër 9 dhe më i saktë para portës. Edhe pse, për hir të së vërtetës, ai ka dhënë shumë pak në këtë Kampionat Europian. Ndoshta lodhja fizike gjatë sezonit me Bajernin ka ndikuar negativisht tek ai dhe disa lojtarë të tjerë.