Refuzimet nga Reali e PSG, Ronaldo drejt rinovimit me Juven
Paga e lartë për arkat dhe skema, ja manovrat
Ylli portugez dhe bardhezinjtë në Serinë A po shkojnë në etapa të zgjatjes së lumturisë mes tyre. Kristiano Ronaldo duket se po bisedon me krerët e Juventusit për një rinovim të mundshëm të kontratës deri në vitin 2023. Kjo bëhet e ditur nga mediat portugeze, më saktë nga televizioni “TVI”. Vendimi i Cr7-ës vjen pas disa jo-ve që ai ka marrë nga disa klube të Europës, të cilat e kanë detyruar të marrë në konsideratë rinovimin e kontratës me Juven.
TENTATIVAT - Javët e kaluara, menaxheri Zhorg Mendesh kishte tentuar ta ofronte klientin e tij te skuadra të nivelit të lartë si Real Madrid apo Mançester Junajtid. Anglezët i kanë sytë te Xhejdën Sanço, lojtar i datëlindjes 2000, ndërsa PSG nuk po mendon ta afrojë portugezin duke zgjedhur t’i ofrojë rinovimin e kontratës Kilian Mbapesë. Pra tani merr kuotë opsioni i rinovimit me Juven. Palët duket se po negociojnë një ndarje të rrogës në dy sezone duke parë që 31 milionë eurot që ai merr, janë shumë për kasat bardhezi.
PUSHIMET – Ndërkohë, Kristiano Ronaldo po shijon pushimet pas eliminimit nga Kampionati Europian, ku Portugalia u mposht në një të tetat nga Belgjika. Gjatë këtij turneu portugezi u ngushëllua me arritjen e rekordit të Ali Daeit të 109 golave të realizuar në garat ndërkombëtare me ekipin kombëtar.
ECURIA - Ronaldo është në Torino që nga viti 2018, ku ka arritur të fitojë dy kampionate të Serisë A dhe dy Kupa të Italisë. Portugezi i ka kushtuar “Zonjës së Vjetër” plot 101 milionë euro, që përbën dhe blerjen më të shtrenjtë të klubit bardhezi. Megjithatë, në Champions, pavarësisht të pasurit në organikë të pesë herë fituesit të turneut, Juve nuk ka arritur të shkojë më shumë se faza çerekfinale në vitin 2019, ku u eliminua nga Ajaksi i Amsterdamit.
SKEMA - Me qëndrimin eventual të Ronaldos në Torino, trajneri Alegri po studion një modul ku portugezi do të jetë në mbështetje të dyshes Dibala-kulusevski. Një tjetër opsion është zhvendosja e tij në krah në rreshtimin 4-3-3, me Dibalën në qendër dhe njërin mes Kiezës ose Kulusevskit në të djathtë. Për shkak të rritjes teknike të Kiezës, Ronaldo, ndoshta rrezikon të nisë ndonjë ndeshje nga stoli.