Atlanta barazon llogaritë, Janis alarmon Millukoin
Goditje e dyfishtë për “Bucks”, dëmtimi i grekut shqetëson
Kemi përsëri barasp eshë në serinë e fi naleve të Konferencës së Lindjes në NBA ndërmjet Atlantës dhe Milluokit. Në takimin numër 4 që u zhvillua në orët e para të mëngjesit të djeshëm ishin “Hawks” ata që fituan me rezultatin 110-88, duke i barazuar ndeshjet në 2-2. Ndonëse nuk mund të mbështetej te Trae Jang, Atlanta nuk fali në shtëpi dhe tashmë gjithçka mbetet e hapur për titullin në Lindje dhe një vend në “Finals”. Një rol vendimtar në fatet e kësaj ndeshje pati edhe dëmtimi që pësoi Janis Antetokounmpo, i cili i largua në periodën e tretë nga loja, për shkak të një dëmtimi në gju. Një lëvizje jonatyrale e gjurit të grekut mban tashmë në ankth Milluokin edhe për sfidat e radhës, në një kalendar që nuk njeh pushim. Finalja e katërt mund të konsiderohet një provë e vërtetë force nga Atlanta. Të zotët e shtëpisë zbritën në parket pa Jangun, i cili nuk ishte ende i gatshëm pas goditjes që mori në kavilje gjatë ndeshjes paraardhëse. Kjo ishte një humbje e madhe për Atlantan, megjithatë
skuadra tregoi karakter dhe ia doli ta kalojë me sukses këtë provë zjarri. “Hawks” luajnë mirë që në fillim teksa shkojnë në pushimin ndërmjet dy pjesëve me 13 pikë avantazh (51-38). Megjithatë, momenti vendimtar që vulosi thuajse gjithçka në këtë sfidë, ishte 7
minuta nga fundi i periodës së tretë, teksa Antetokounmpo pësoi një dëmtim në gju, duke u larguar para kohe nga parketi. Greku mbështeti keq këmbën e tij të majtë dhe mbeti i shtrirë për disa sekonda, duke ulëritur madje nga dhimbjet. Një episod që i mban në ankth
“Bucks” për ndeshjen e pestë. Menjëherë pas dëmtimit të numrit 34 të Milluokit, Atlanta shpërthen me një rezultat parcial 12-0, duke e dërguar avantazhin në shifra të përgjithshme në +20 pikë. “Bucks” nuk kanë më forcë, mbi të gjitha psikologjike për reaguar dhe gjithçka mbyllet me festën e skuadrës vendëse. Gjashtë lojtarë të Atlantas regjistruan dopioshifër pikësh, ndërsa spikatën Lu Uilliams me 21 pikë, 8 asiste dhe 5 topa të rikuperuar në tabelë. Shkëlqeu gjithashtu edhe Bogdan Bogdanoviç, autor i 20 pikëve. Në radhët e Milluokit, Antetokounmpo zhvilloi një pjesë të parë të dobët, me vetëm 6 pikë të shënuara. Megjithatë, greku ndryshoi marsh me rifutjen në parket, duke realizuar 8 pikë në minutat e para të periodës së tretë, para se të largohej i dëmtuar. Ndërsa nga lojtarët e tjerë të “Bucks”, dopioshifër arritën vetëm Holidei (19) dhe Midëllton (15). Finalja e pestë do të luhet në orët e para të mëngjesit të nesërm, këtë herë në fushën e Milluokit. Ndërkohë për sa i përket Konferencës së Perëndimit, në mëngjesin e sotëm është zhvilluar ndeshja e pestë ndërmjet Klipers dhe Feniks, teksa “Suns” kryesonin 3-2 para kësaj sfide.