Flamurtari mes dilemave të mëdha, titullarët mendojnë largimin
Bashkia dhe administratori nuk po ndihen për të ardhmen
Flamurtari mes dilemave të mëdha. Nuk ka asgjë të qartë në kampin vlonjat, sidomos pas rrëzimit në Kategorinë e Dytë. Për të ardhmen të gjithë janë pa një plan konkret. Bashkia dhe administratori që nuk janë “as në qiell e as në tokë”, por në ankth janë sidomos lojtarët. Këta të fundit janë në një mëdyshje të madhe. Nuk dinë a do të rrinë apo të ikin. Titullarët dhe lojtarët me eksperiencë, menjëherë pas rënies në inferiore, nxituan që të shprehnin besnikëri, por duket se me kalimin e ditëve dhe në kushtet kur mungon një plan i qartë, po mendojnë largimin. Nëpërmjet burimeve konfidenciale pranë vetë futbollistëve, “Panorama Sport” mëson se boshti i ekipit në sezonet e fundit, Shpëtim Moçka, Andi Ribaj, Mateo Qarri, Krenviol Kreshpa, Gersi Diamanti, po shohin alternativa të tjera. Megjithatë, ata pohojnë të gjithë se në plan të parë është Flamurtari. “Nëse ka një plan të qartë për të ardhmen, qëndrojmë në Vlorë për të ringritur ekipin. Zgjedhja jonë e parë është Flamurtari”, shprehen njëzëri ata.
PËRGATITJET - Sezoni i tretë dhe historia po përsëritet. Duket se nuk ka asnjë plan që Flamurtari të formojë ekipin e ri që do ta përfaqësojë në Kategorinë e Dytë. Deri tani nuk ka asnjë listë nga klubi me emrat e lojtarëve që do të ketë në organikë sezonin e ri. Po ashtu, nuk ka asnjë emër që të lakohet si trajner i Flamurtarit. Sikurse sezonin e fundit në Superiore, sezonin në Kategorinë e Parë, edhe tani në të Dytën me shumë mundësi gjërat do të lihen për në limite, çka do ta vështirësojë edhe më shumë sezonin e vlonjatëve në këtë kategori të panjohur e të paprekur më parë. Flamurtari sezonin e ri do të përfaqësohet në elitë vetëm nga ekipet e moshave, që fatmirësisht arritën të shpëtonin. Nisur nga ky fakt, ekipet e akademisë nisën stërvitjen javën që shkoi, disa nga lojtarët e Flamurtarit filluan stërvitjen me ekipin U19. Kështu, Kreshpa, Diamanti, Bocaj janë vendosur nën urdhrat e trajnerit Fjodor Xhafa. Ndërsa vihet re mungesa e Moçkës, Ribajt dhe Qarrit që janë të pavendosur për të ardhmen. ERMAL SIKA