Plani i shitjeve, lojtarët e Bylisit mbeten... “stok”
Nga Qirko tek Ujka kanë oferta, por ngec transferimi
Pasi shitën Franci Ymeraliajn tek Eg natia për 25 mijë euro dhe Valentino Muratajn te Partizani për 50 mijë euro, ngecin transferimet e tjera. Janë jo pak, por 6 futbollistë të Bylisit që kanë mbetur “stok”. Edhe pse nuk u kanë munguar ofertat gjatë kësaj periudhe, klubi nuk e ka ndarë ende mendjen. Shkaku: kërkesat nuk janë brenda pritshmërive të drejtuesve. Me merkaton që është në kulmin e saj, në Ballsh nuk pezmatohen. Ata janë të bindur se deri në mbyllje të “dritares” së hyrje-daljeve, do të kenë shitur lojtarë si Pano Qirko, Milosh Stojanoviç, Stivian Janku, Andi Hadroji, Serxho Ujka, por sidomos Beji Antoni. Nga ky i fundit kanë shumë më shumë shpresa në fakt, pasi të shumta janë ofertat që kanë ardhur në adresë të nigerianit edhe nga jashtë. Ai ishte shënuesi më i mirë i mallkastriotëve dhe më të spikatur e krejt kampionatit në sezonin 2019-2020 dhe kjo gjë shihet si “bonus”. Për titullarët e Bylisit kërkesat nuk kanë munguar nga Tirana, Dinamo, Partizani apo dhe Egnatia. Kjo është një periudhë tranzitore në klubin, aq sa aktualisht janë të përqendruar te skuadra U-19 (që është duke zhvilluar fazën “play off” për t’u shpallur kampion me skuadrat e të rinjve në grupet A, B dhe C në këtë grup-moshë). Aq e kanë vlerësuar këtë kompeticion, sa kanë aktivizuar edhe elementë të ekipit të parë si: Beqaj, Kosti, Mehmetaj, Preka, Emini apo dhe Ruçi e Haxhiaj e Vrenozi. Ballshiotët kanë qenë gjithmonë një skuadër që i kanë dhënë tonin Kategorisë së Parë, por po parapërgatiten për një garë më të vështirë. Derisa do të luhet vetëm me një grup të vetëm, rivaliteti dhe konkurrenca do të jetë shumë e madhe. E megjithatë, hapi i parë dhe i rëndësishëm që do të ndërmerret është trajneri. Që pas largimit të Veljko Dovedanit, klubi është i pavendosur për pasardhësin. Edhe pse janë duke shqyrtuar disa opsione, i kanë dhënë edhe pak kohë vetes deri të zgjedhin “timonierin”.