Xhumba: Erdha të ringre Luftëtarin e tradhtuar
“Sporti u takon njerëzve të sportit, boll më me rrogëtarë”
Luftëtari po hedh hapa të sigurt për ringritjen. Vërtet iu desh ta nisin nga fundi (Kategorinë e Tretë), e megjithatë plani i drejtuesve është i qartë: të ngjiten një orë e më parë në elitë. Ky rrugëtim ka ende punë në fakt, pasi sezonin 2021-2022 do t’u duhet që të militojnë në Kategorinë e Dytë. Gjirokastritët e dinë që duhet të jenë me këmbë në tokë dhe riorganizimi të jetë i mirëmenduar. Është ky shkaku që kanë zgjedhur një emër të mirënjohur edhe për akademinë. Do të jetë pikërisht Altin Xhumba, përgjegjësi për sektorin e moshave. Në një prononcim të dhënë enkas për “Panorama Sport”, ai na shpalos projektin e riorganizimit të AF Luftëtari. “Njerëzit e sportit janë ata që duhet të bëjnë sportin. Unë futbollin e kam në gjak. Im atë,
Gligori, në vitet ‘60-‘70 ka veshur fanellën e Luftëtarit. Im vëlla, Ariani, po ashtu, përfaqësoi me dinjitet këtë ekip dhe atë kuqezi. Ai mban edhe statusin e lojtarit gjirokastrit me më shumë përfaqësime me Kombëtare. Pse e bëra këtë prezantim, pyesni?! Për të treguar që Luftëtari nuk është i askujt, por i të gjithëve. Më vjen shumë keq që ky qytet me emra emblemë në futbollin gjirokastrit dhe atë kombëtar të kishte fundin e pamenduar nga askush. Dhe, duke qenë i të gjithëve, mora mbi ‘supe’ ringritjen e Luftëtarit të tradhtuar dhe shkatërruar me qëllim. Pranova me dëshirë pozicionin e drejtorit të akademisë, vetëm e vetëm që Luftëtari të mbetet në nivele të larta. Futbolli është pasion dhe si i tillë duhet të funksionojë. Nga unë i pari dhe të gjithë me radhë, na kërkohet të krijojmë sa më shumë masivitet mes fëmijëve. Qëllimi parësor i punës sonë do jetë furnizimi me lojtarë cilësorë Luftëtarit. Së bashku me administratorin Hysi, kryebashkiakun Golemi, jemi duke punuar me ndarjen e grup-moshave”, tha fillimisht mbrojtësi i viteve 1990-2000.
PLANI - Në Gjirokastër po punohet nga drejtuesit e AF Luftëtari për ristrukturimin e akademisë bluzi. Këtë e bën të ditur drejtori aktual Altin Xhumba. “Kanë pak rëndësi rezultatet e akademisë, ajo që ne duam është prodhimi i 5-6 lojtarëve në vit, që t’i shërbejnë ekipit të parë pas 3-4 sezoneve. Për të përmbushur këtë detyrë, kemi mbështetjen e bashkisë. Falë këtij bashkëpunimi, është menduar që fëmijët të paguajnë nga 3000 lekë të rinj në muaj. Natyrisht që do të përfaqësohemi nga moshat 9 deri në 19 vjeç këtë sezon futbollistik. Gjykojmë se është një vlerë monetare që nuk rëndon te xhepat e prindërve, po të marrim në konsideratë se shërbimet e tjera do të merren përsipër nga presidenca. Mbi të gjitha, trajnerët do të jenë profesionistë. S’do të ketë më trajnerë ‘rrogëtarë’. Që të bësh futboll dhe të jesh futbollist, duhen tri elemente të rëndësishme: Sakrificë, pasion, punë”, përfundoi Xhumba.