Dinamo, drejt zyrtarizimit Agim Ibraimi dhe Besir Demiri
Dinamo po insiston për të mbyllur sa më shpejt dy “operacione” të vështira në këtë merkato vere. Ashtu siç ka paralajmëruar “Panorama Sport” prej ditësh, kapiteni i Kukësit në sezonin e fundit, Agim Ibraimi, si dhe mbrojtësi i majtë, Besir Demiri, janë shumë pranë firmës me kryeqytetasit. Në parim, të dy lojtarët kanë gjetur akordin dhe pritet që deri këtë fundjavë të konkretizohet gjithçka me nënshkrimin e kontratës. Burime në klubin blu tregojnë se lojtarëve u është dërguar zyrtarisht kontrata me “email” dhe tashmë mbetet firma, pasi Dinamo ua ka plotësuar kërkesat. Mësohet se trajneri Bledi Shkëmbi e parashikon Demirin si një mesfushor qendre, ndërsa në krahun e majtë të mbrojtjes do të luajë maqedonasi Isaevski. Nga ana tjetër, Ibraimi shihet si numri 10 ideal për skemat e Shkëmbit. Me këta dy futbollistë të afirmuar, Dinamo kompleton repartet, në një kohë që për majën e sulmit, titullar shihet nigeriani i ardhur nga Hajduk Split, Stefen Çinedu. SYNIMET - Skuadra e Dinamos do të jetë me pretendime, jo vetëm të mbijetesës siç prezantohen rëndom në çdo sezon ekipet që debutojnë, por do të synojë të paktën zonën europiane dhe oreksi mund ta çojë edhe në fitimin e ndonjë trofeu. Dinamovitët i kanë munguar shumë elitës dhe për këtë ata nuk duan të zhgënjejnë vetëm me mbijetesën. Skuadra e Dinamos po merr formë përditë, nga ku përveç rinovimeve një hapësirë të madhe ka marrë ajo e merkatos, e cila po bëhet më konkrete, teksa shumë prej lojtarëve po firmosin kontratat e reja, madje priten në ditët në vijim dhe mjaft surpriza të tjera, siç është sulmi apo mesfusha. A.DUSHKU