Çelsi e ka seriozisht për Halandin, gati 175 mln euro
Abramoviç firmos çekun, shet Odoin, Zijehun dhe Abrahamin
Erling Haland nuk u prezantua dje në grumbullim me Borusian e Dortmundit. Mungesa e tij është e pajustifikuar dhe një mister në Gjermani. Por, drejtori sportiv i verdhezinjve, Mikael Cork, e zhdramatizoi të gjithë situatën e krijuar përpara telekamerave të “Sky Sports Deutschland”. “Është që tani në Angli”, ironizoi shefi i Dortmundit. Por sipas “Bild”-it, Çelsi e ka seriozisht për sulmuesin norvegjez dhe pronari Roman Abramoviç ka dhënë dritën jeshile për të firmosur një çek prej 175 milionë eurosh. Pasi shitën Xhejdën Sançon te Mançester Junajtid, në shtëpinë e Dortmundit është përsëritur shumë herë pashitshmëria e kampionit norvegjez. Menaxheri i tij, Mino Raiola, i cili tundohet nga një komision prej 40 milionë eurosh, nxit një transferim të klientit të tij dhe në Londër janë gati për sulmin përfundimtar, me kampionët e Europës që e duan që këtë sezon në “Stamford Bridge”. Për të ekuilibruar bilancet për transferimin e 20-vjeçarit, Çelsi është gati të shesë tre lojtarë: Kallëm Hadson-odoin, Temi Abrahamin dhe Hakim Zijehun. Haland, i cili ka një kontratë deri në verën e vitit 2024 në Dortmund, ka një klauzolë që në 2022 mund të ndërrojë skuadër për 75 milionë euro. Por, pandemia ka goditur edhe arkat e klubit gjerman,
që ka regjistruar një humbje prej 75 milionë eurosh në bilancin e fundit të 30 qershorit. Këtyre u shtohen edhe 43.9 milionë eurot e humbura nga një sezon më herët. Qëllimi i klubit të Bundesligës është ta konfirmojë sulmuesin edhe për një
tjetër sezon, por në valle janë shumë para dhe surprizat deri në fund të gushtit nuk përjashtohen. “Asgjë nuk ka ndryshuar. Ne jemi të vendosur dhe e kemi planifikuar skuadrën me Halandin sezonin e ardhshëm”, tha Cork për “Bild”.
RACIZMI – Haland dënoi sulmet raciste ndaj tre sulmuesve me ngjyrë të Anglisë, Markus Rashford, Xhejdën Sanço dhe Bukajo Saka, pasi humbën penalltinë në finalen e Europianit kundër Italisë. “Nuk e kuptoj përse ka ende hapësirë për racizëm dhe diskriminim. Ne nuk do të lodhemi kurrë së luftuari kundër çdo lloj diskriminimi. Në vend që të duartrokiten se patën guximin për të goditur penallti, këta djem të rinj sulmohen me fyerje raciste. Jam pa fjalë”, shkruante në “Twitter” bomberi i Norvegjisë.