Elbasani i ri, tani polemikat janë për... logon
Prezantimi i klubit më 2 gusht, konfirmohet edhe “kupola”
Zbulohet logoja e AF Elbasanit. Dje ka qarkulluar në rrjet stema e ekipit më të ri në qytet dhe duhet thënë se ishte aq shumë e ngjashme me të vjetrën. Dominonin ngjyrat verdheblu (ndonëse më të theksuara) dhe në qendër të saj ishte vendosur edhe simboli i Kullës së Sahatit. Ajo që të bënte përshtypje, ishte viti i krijimit. Në të shënohet 1913-ta, që në fakt i përket skuadrës që drejtohet prej Arben Lazes. Ky klub i ri futbolli, që zotërohet 100% prej Bashkisë Elbasan, është krijuar vetëm pak ditë më parë, pra në vitin 2021. Mund të jetë një gabim ose jo, kjo mbetet të zbulohet në vazhdim. Vetëm një gjë është e sigurt: në të duhet të ishte viti 2021. Dhe shembullin e kemi të freskët e të prekshëm. Jo më larg se një vit më parë u krijua AF Luftëtari dhe në të nuk ishte viti i krijimit të ekipit të vjetër gjirokastrit, por 2020. Deri në ditën që do të prezantohet zyrtarisht klubi i ri i futbollit për publikun e gjerë dhe mediat, ka të ngjarë që ky detaj të korrigjohet. Ndaj, nuk përjashtohet mundësia e një modifikimi të logos...
PREZANTIMI - Prezantimi i AF Elbasanit do të bëhet më 2 gusht. Burime të “Panorama Sport” konfirmojnë se nga administratori Mareglen Çoku dhe deri te trajneri Gentian Stojku do të bëjnë prezantimin zyrtar që do t’i hapë më pas rrugë edhe nisjes së përgatitjeve për sezonin 2021-2022. Këto burime pohojnë se do të jetë i njëjti staf që gazeta paralajmëroi pak ditë më parë, duke e konsideruar edhe si “ekipin” që do të ketë një detyrë të rëndësishme përpara: ngjitjen sa më shpejt në elitën e futbollit shqiptar. Mësohet gjithashtu se gjatë kësaj periudhe kanë kontaktuar me futbollistë që kërkojnë t’i afrojnë në skuadër dhe do të vijojnë ta bëjnë këtë deri në kompletimin e grupit. Në listë janë emra të rëndësishëm të futbollit elbasanas, që më herët kanë milituar madje deri në Kategorinë Superiore. Ata kanë shprehur paraprakisht gatishmërinë për të qenë pjesë e ekipit më të ri në qytet. Përveç skuadrës të parë, prioritet do t’i jepet edhe ngritjes së një akademie të mirëfilltë futbolli, teksa mbeten për t’u përcaktuar edhe trajnerët e moshave.