Europiani i moshave, përcaktohen skuadrat gjysmëfinaliste
Rusi-itali dhe Poloni-slloveni, betejat për trofeun
Prej një jave Shqipëria është kthyer në epiqendrën e volejbollit të moshave, teksa në vendin tonë po mbahet Kampionati Europian U-17 për meshkuj. Një event ky që ka sjellë në Tiranë talentet më premtues të sportit të rrjetës të kontinentit të vjetër, ku salla “Feti Borova” dhe palestra e re e Farkës janë kthyer për ditë më radhë në arena duke dhuruar përballje shumë interesante. Kompeticioni tashmë është futur në fazën e tij më të nxehtë, teksa mbrëmjen e djeshme janë mbyllur edhe ndeshjet në grupe, ku dhe janë mësuar skuadrat e kualifikuara për në “play off”, të cilat do kenë mundësinë për të luftuar për titullin e shumëdëshiruar. Kështu me përfundimin e fazës së grupeve, janë mësuar edhe çiftet gjysmëfinaliste. Më 17 korrik në sallën “Feti Borova” Rusia do të ndeshet me Italinë, ndërsa në orën 19:30 Polonia do të sfidojë Slloveninë. Në të njëjtën datë në palestrën e Farkës do të luhet për vendet 5/8, ku ndeshja e parë do të jetë në orën 14:00 ndërmjet Belgjikës dhe Serbisë, për të vijuar më pas në orën 16:30 me takimin Bullgari-letoni. Për sa i përket Shqipërisë, kuqezinjtë e vegjël të cilët u drejtuan nga trajneri Erin Sejati e mbyllën grupin me 5 humbje në po kaq takime. Në sfidën e djeshme të zhvilluar në palestrën e Farkës, Shqipëria u mposht nga Rusia kryesuese me rezultatin e pastër 3-0. Një ndeshje e dominuar tërësisht nga rusët, të cilët i fituan të tria setet në shifra të thella (25-9, 25-11, 25-11). Ndonëse nuk mundën të fitojnë qoftë edhe një set të vetëm, ky kompeticion është një përvojë më tepër për kuqezinjtë e vegjël të rrjetës, të cilët u përballën me kombëtaret më të mira të volejbollit europian. Megjithëse rezultatet në parket kanë qenë të dobëta, Shqipëria mund t’i gëzohet organizmit mjaft të mirë të një eventi të tillë. Për sa i përket situatës në Grupin 1, komandoi Rusia, e cila u rendit në vend të parë më pikë të plota, e ndjekur nga Sllovenia. Në Grupin 2 rivaliteti ishte më i lartë, ndërsa vendi i parë dhe i dytë shkuan respektivisht për Poloninë dhe Italinë.