Inteligjencë dhe dinakëri, Depaj i sjell gola Barçës
Ka teknikë të lartë dhe shënon si sulmues i madh
Barcelona është duke e forcuar organikën e saj me disa futbollistë të rinj gjatë kësaj kohe. Sigurisht që transferimi më interesant deri në këto momente është sulmuesi holandez Memfis Depaj. Pavarësisht se ai nuk bëri një Europian për t’u mbajtur mend, numrat në nivelin personal janë korrektë. Depaj ka shënuar 2 gola dhe dha 2 asiste në 4 ndeshje që luajti Holanda. Gazetat spanjolle kanë analizuar se çfarë do t’i sjellë Depaj Barcelonës me praninë e tij në fushën e lojës.
PIKË PASIMI- Aspekti i parë që merret parasysh është lëvizshmëria e holandezit brenda fushës së lojës. Ai ka kapacitet shumë të lartë për t’u çmarkuar nga kundërshtari në thellësi. Në momentin që duket sikur po shkon drejt zonës kundërshtare, ai menjëherë bën disa hapa mbrapa për të mbështetur aksionin dhe për t’u bërë një pikë referimi për shokët e skuadrës. Diçka e tillë kuptohet në foton e parë. Falë kësaj lëvizjeje, ish-lojtari i Lionit është një alternativë më shumë për pasim. Depaj është i zoti për të lëvizur mes linjave dhe mund të bëhet problematik për kundërshtarët.
NË THELLËSI- Në radhë të dytë, Memfis është gjithashtu i zoti për të kuptuar mjaft mirë në fushën e lojës se kur është momenti për t’u tërhequr dhe kur duhet të shkojë drejt zonës rivale apo ato që quhen çmarkime në thellësi. Edhe në këtë aspekt është shumë i fortë duke luajtur pas shpinës së mbrojtjes kundërshtare.
VERTIKALISHT- Aq sa i pëlqen të shoqërojë aksionet, aq shumë i pëlqen edhe t’u japë vertikalizim atyre. Gjithmonë mundohet të sulmojë zonat e ngushta dhe të kapë në befasi shpinën e lojtarëve kundërshtarë. Kjo e bën të quhet si një sulmues i parë, edhe pse ka elementet e një numri 9 fals.
KAPËRCIMET- Siç mund të shihet edhe nga fotot, Depaj nuk qëndron kurrë i ngurtë, por lëviz shpesh dhe u jep mundësi shokëve që ta kërkojnë në hapësira. Një nga lëvizjet e tij të shumta është depërtimi nga pjesa anësore e fushës drejt qendrës. Shpeshherë e bën këtë gjë me topin në këmbë, ndërsa herë të tjera shërben shokët e skuadrës.
FINALIZIMI- Sigurisht që aspekti kryesor i një sulmuesi është finalizimi dhe Depaj e ka këtë gjë. Nuk është një “pykë”, por në karrierën e tij ka shënuar shumë gola. Ai ka një talent të jashtëzakonshëm përpara portës kundërshtare. Ekzekutimet e tij janë me stil dhe jo me forcë. Lëvizja e trupit e ndihmon shumë për të qenë i saktë në portën kundërshtare. Të gjitha këto elemente do t’i shërbejnë Barcelonës për t’u përmirësuar ndjeshëm dhe për të pasur në organikë një lojtar që do të kuptohet me sy mbyllur me Lionel Mesin.