Shkëmbimi Grizman-saul drejt mbylljes, fitojnë të dyja klubet
Francezi mungoi në prezantimin e fanellës së dytë
Një nga të vërtetat e hidhura të Barcelonës për të bindur Lionel Mesin që të qëndronte me klubin, ishte fakti se një numër lojtarësh të skuadrës së parë duhet të largohen për të ekuilibruar bilancet financiare të klubit. Dhe, si rezultat, një shkëmbim i mundshëm mes Antuan Grizmanit dhe Saul Niguezit po bëhet gjithnjë e më i mundshëm. Atletiko e Madridit ka transferuar Rodrigo de Polin këtë merkato, duke shtuar radhët në mesfushën e vet dhe prej kohësh është përfolur se Saul mund të sakrifikohet këtë verë. Nuk duhet harruar se në mes të pandemisë, “Los Colchoneros” duhet ende të paguajnë kredinë e ndërtimit të stadiumit të ri “Wanda Metropolitano” dhe Saul është një lojtarët e tyre më të çmuar, por edhe i zëvendësueshëm. Fillimisht një shkëmbim me Grizmanin ishte shumë i vështirë për t’u konceptuar, duke qenë se Atletikos i shtohej një rrogë e lartë, pavarësisht se nuk do të paguante për kartonin e ishsulmuesit të vet. Por për një gjë të tillë Atletiko dhe Barcelona janë duke diskutuar, sepse edhe katalanasve u largohet një futbollist i jashtëzakonshëm, i cili është zëvendësuar që tani me afrimet me parametër zero të Serxho Agueros dhe Memfis Depajit (dy dëshira të trajnerit Kuman). Një ditë më parë, në prezantimin e fanellës së dytë të katalanasve për sezonin e ardhshëm, Grizman mungonte. Një tjetër sinjal se largimi i tij nga “Camp Nou” është një fakt i kryer. Ronald Kuman do të ketë në këtë mënyrë me Saulin profilin e futbollistit që ai dëshironte në mesfushë, i ngjashëm me atë të Xhorxhino Vajnaldumit, të cilin ata e kërkuan me ngulm, por në fund holandezi zgjodhi PSG-NË. Marrëveshja është shumë pranë mbylljes, sipas mediave spanjolle, por lojtarët duhet të bëjnë sakrificat e tyre përpara se të vijë edhe konfirmimi publik.