De Biazi “ia hedh” FIFA-S, FSHF pret gjyqin për Bajramin
Prapaskena, si Azerbajxhani merr lojtarin kroat
Nedim Bajrami është duke u përgatitur si lojtar i Serisë A. Pas pushimeve, mesfushori i Empolit u është bashkuar emilianëve në fazën përgatitore për të nisur këtë edicion në elitën e futbollit italian, pas suksesit një sezon më herët në Serinë B duke u shpallur kampionë. Mirëpo, një sy vetë futbollisti edhe ka edhe nga FIFA. Ka dëshirën dhe ka dhënë fjalën për të luajtur me Shqipërinë, por Edi Reja duhet të presë për të bërë plane me të. E ndërsa FSHF ka përpiluar dosjen dhe është në kërkim të interpretimit të fakteve për ta fituar përballjen në KAS, Xhani De Biazi feston nga vendimi i FIFA-S.
PRECEDENTI NË FAVOR
Nedim Bajrami u pengua nga FIFA që të luante me Shqipërinë, për shkak të një neni të shtuar në rregulloren e FIFA-S që lojtarët nuk mund ta ndërrojnë një përfaqësuese, nëse në moshën 20-vjeçare kanë zhvilluar ndeshje me të mëparshmen, qoftë edhe në ekipin U-21. Bajrami ka zhvilluar katër të tilla me Zvicrën U-21. Mirëpo, së fundmi FIFA ka lejuar një tjetër futbollist i cili në moshën 26-vjeçare, ka zhvilluar dy miqësore me Kroacinë, e ndërsa së fundmi është lejuar të ndërrojë përfaqësuese.
FESTON DE BIAZI
Në drejtimin e Shqipërisë, Xhani de Biazi ishte gjithashtu nju ndër aktorët kryesorë në seancën dëgjimore që FSHF fitoi përballë UEFA-S për ndeshjen në Serbi. “Nuk mund të kthehesh më në arenë, kur e di që kafazi me luanë është i hapur. Asgjë nuk është më e sigurt”, ishte ndër të tjera fraza e thënë nga ish-trajneri i Kombëtares, në gjyqin e zhvilluar në KAS. Së fundmi, De Biazi ka fituar të drejtën që në përfaqësuesen e Azerbajxhanit të ketë Filip Ozobiç, lojtarin që ka luajtur me të gjitha ekipet e moshave të Kroacisë. Jo vetëm kaq, por ka debutuar me ekipin A kroat në moshën 26vjeçare, në miqësoret kundër Kilit dhe Kinës. I lindur në Bjelovar, në Kroaci, mesfushori 30-vjeçar ka marrë të drejtën nga FIFA për të qenë nën urdhrat e De Biazit tek Azerbajxhani. Fakt lehtësues për këtë rast, ka qenë karriera prej pesë vitesh në Azerbajxhan e mesfushorit me skuadrat e Gabalasë (2016-2018) dhe Karabakut prej vitit 2018.
GJYQI I FSHF-SË NË KAS NDAJ FIFA-S
Shqipëria beson që në KAS, çështja do të lexohet pozitivisht dhe dëshira e Nedim Bajramit, të shkojë deri në fund për të përfaqësuar Shqipërinë. “Panorama Sport”, ka mësuar se në KAS janë ndërruar gjyqtarët e caktuar rishtazi për këtë çështje dhe tanimë FSHF është në pritje të caktimit të gjyqtarëve të rinj që do të shqyrtojnë këtë çështje. Nga sa bëhet me dije, FSHF si palë e cila ka bërë ankiminin dhe kërkesën në KAS, ka marrë garancinë që përgjigjja do të jetë të paktën përpara grumbullimit të kombëtareve në shtator. Kësisoj, me shpresën që do të jetë një përgjigje pozitive dhe Bajrami të jetë i gatshëm për sfidat Poloni-shqipëri (2 shtator), Shqipërihungari (5 shtator) dhe Shqipëri-san Marino (8 shtator), trajneri Edi Reja do të marrë përfundimisht përgjigjen nëse mund të ketë në dispozicion fantazistin e Empolit apo jo.