Kapsolla dhe fishekzjarrë, si u kërcënua me ndërprerje
Ndërprerje loje, kërcënim për të mos vazhduar më ndeshjen nga arbitri dhe delegati i UEFA-S, por edhe festë e çmendur dhe lot gëzimi në fund. Në Vllaznia-shiroki ndodhën nga të gjitha dhe delirin e kuqebluve për kualifikimin për pak e prishën tifozët me hedhjen e fishekzjarrëve dhe kapsollave, duke bërë që klubi të rrezikojë tashmë një gjobë të majme nga Komisioni i Disiplinës në UEFA. "Panorama Sport" ju sjell të gjitha pikantet e ndeshjes së djeshme. PROBLEMET * Në minutën e 10-të gjyqtari kryesor, Kaspar Sjoberg, ndërpret lojën për rreth 2 minuta pas një kapsolleje të hedhur në pistën e stadiumit, afër anësorit të dytë Magnuson. Arbitri kërkoi nga kapitenit Gurishta që të qetësonte tifozët. Mbrojtësi ka komunikuar me tifozërinë në tribunën përballë, prej edhe nga u hodh kapsolla. Më pas, në minutën e 28-të, grupimi "Power 12" ka hequr pankartën në shenjë proteste të ndërhyrjes së drejtuesve të klubit për të ndaluar fishekzjarrët dhe tymueset e përdorura në stadium nga ana e tyre. Problemet kanë vijuar në minutën e 41-të, kur pas një shishe të hedhur në fushë, forcat e sigurisë së stadiumit, kanë nxjerrë menjëherë jashtë personin që bëri këtë veprim. Përpara se të niste ndeshja, klubi kishte paralajmëruar tifozët se nuk lejohen në stadium materiale piroteknike si shashka, kapsolla, flakadanë etj. Por, tifozëria nuk e respektoi këtë, duke harruar që çdo shkelje e rregullave të UEFA-S penalizon rëndë Vllazninë, si në anën financiare, ashtu edhe në dënimin e fushës.
* Pas golit të parë në fillimin e pjesës së dytë nga Gjurgjeviç, festa e tifozëve ishte e çmendur, por sërish u ndezën dy fishekzjarrë, në një kohë që në pistë u hodh një tjetër kapsollë, ashtu si në fillim. Këtu arbitri kryesor, pas sinjalizimit edhe nga asistenti, menjëherë urdhëroi ndërprerjen e lojës dhe futjen e ekipeve në dhomat e zhveshjes. Pra, nga një gëzim për golin, në një hidhërim për situatën. Për 5 minuta loja u ndërpre, derisa arbitri suedez, Sjoberg, si dhe delegati i UEFA-S, greku Aristidhis Stavropulos, kërcënuan se nëse ndodh edhe një herë e njëjta gjë, loja do të ndërpritej përfundimisht.
Ka qenë sërish kapiteni Gurishta që ka shkuar në tribunën përballë dhe ka kërkuar nga tifozët të mos hedhin më kapsolla dhe ndezin fishekzjarrë, sepse është rreptësisht e ndaluar. TË TJERAT... * Afro 45 minuta para nisjes së takimit, ka nisur të mbushej stadiumi "Loro Boriçi". Burime në klub treguan se ishin shitur 4700 bileta, duke respektuar rregullin e me një limit prej 30 % të impiantit.
* Klubi Vllaznia nuk ka bindur dot UEFA-N që përpara ndeshjes të mbahet një minutë heshtje për ndarjen nga jeta të ish-futbollistit shkodran, Aziz Gruda. Gjithsesi, tifozëria shkodrane i ka dhënë për afro një minutë duartrokitje të pandërprera të ndjerit Gruda. * Përqafime dhe lot gëzimi të Eni Imamit pas shënimit të golit. Në momentin e golit të tretë, fluturoi në fushë për të festuar me shokët edhe Ardit Hoxhaj, që kishte vetëm pak minuta që kishte lënë lojën.
* Festë e çmendur në dhomat e zhveshjes pas ndeshjes, ndërsa në dhoma u bashkua edhe trajneri Brdariç e Krymi, që dje ishin të pezulluar. Gjermani, për pak sa nuk ka rrëshqitur te hyrja e stadiumit.