Gashi konfirmon largimin, ka dilema edhe për Shytin

Kur ditët po kalojnë, Egnatia ka përfunduar ditën e katërt të fazës përgatitore. Nga gazeta mësohet se të dy titullarët e sezonit të kaluar, Gashi e Shyti, kishin rinovuar, por nga klubi nuk ka njoftim zyrtar për vazhdimësinë e tyre. Burime të gazetës bëjnë me dije se vetë Gashi dëshiron të luajë në kampionatin kosovar për shkak të largësisë nga familja. Gjatë sezonit që përfundoi ishte pjesë e fitimit të dy trofeve duke u aktivizuar në 21 përballje e arriti të shënonte vetëm një gol. Në një status të publikuar kosovari shprehet se nuk do të jetë pjesë e Egnatias në sezonin e ri, i falënderon të gjithë nga presidenti, stafin, tifozët e me radhë. "Faleminderit KF Egnatia. Dua t'ju njoftoj që nuk do jem më pjesë e klubit më të ri në Superiore KF Egnatia. 'Luftën' që nisëm e arritëm së bashku me stafin presidencial, stafin teknik, bashkëlojtarët po ashtu dhe tifozët. Dua edhe t'ju falënderoj gjithsecilin nga ju për respektin, emocionet e besimin maksimal që më keni dhënë gjatë gjithë kampionatit. Ju dëshiroj fat në Superiore dhe arrini në majat e futbollit shqiptar apo dhe më tutje", përfundon statusin në "Facebook"-un e tij Gashi. Ndërsa për Ildian Shytin nuk ka ndonjë detaj se do të jetë pjesë e projektit të elitës me rrogozhinasit sërish apo do të ndërpresë bashkëpunimin pas një sezoni.

Për sa i përket brazilianit Lukas Ramos, bisedimet sapo kanë nisur e pas dakordësisë mund të ketë edhe firmë. Drejtuesit janë aktivë e po bëjnë të pamundurën për plotësimin e atyre roleve që duhet të kenë më shumë alternativa përzgjedhjeje.