Skënderbeu nis stërvitjen, por mungojnë disa titullarë
Skënderbeu nis përgatitjet zyrtarisht për sezonin e ri. Nga Korça bardhekuqtë e drejtuar nga Migen Memelli kanë zhvilluar seancën e parë stërvitore, ndërsa janë prezantuar me ekipin edhe afrimet e para.
Megjithëse me një grup jo të plotë në dispozicion, numri një i pankinës korçare ka zgjedhur të fillojë gjithçka me një analizë të shpejtë, duke përmendur mbylljen e sezonit të kaluar dhe pritshmëritë për sezonin e ri.
Nën sytë e presidentit Ardjan Takaj që ishte i pranishëm në stadium ditën e djeshme është zhvilluar më pas edhe seanca e parë stërvitore ku gjithçka është përqendruar tek testimet fizike të lojtarëve. Këtu, Memelli është treguar tepër korrekt dhe strikt për sa u përket testeve, duke mos toleruar askënd dhe asgjë në ditën e djeshme. Gjithsesi, rezultatet përfundimtare kanë qenë deri diku pozitive për trajnerin bardhekuq, i cili ka qenë përgjithësisht i kënaqur me pjesën kryesore të ekipit, ndërsa befasia ka ardhur nga akademia Skënderbeu.
Rei Pecani, i dalë nga ekipet zinxhirë të Skënderbeut ka qenë lojtari që ka befasuar Memellin në testet fizike aq sa trajneri nuk ka ngurruar që ta falënderojë dhe vlerësojë para të gjithëve.
Në stërvitjen e parë të Skënderbeut është parë edhe përgatitësi i ri atletik, Lazaros Pantazi, i cili i shtohet tashmë stafit bardhekuq.
RIKTHIMET - Ajo që binte në sy që në kontaktin e parë me ekipin ishte rikthimi i Uerdi Marës, i cili me shumë mundësi i është bashkuar Skënderbeut përfundimisht. Ndërsa nga ana tjetër në stërvitje u shfaq sërish Remi Dujardin. Futbollisti aziatik "i zhdukur" prej muajsh rikthehet sërish në Korçë për të vijuar procesin stërvitor me Skënderbeun.
MUNGESAT - Mungesat ishin ato që të binin më shumë në sy te Skënderbeu, pasi shumica e titullarëve mungonin në stërvitjen e parë. Duke filluar nga kapiteni Jorgo Meksi e për të vazhduar me Rexhepin, Sadriun, Mensah dhe Randi ishin lojtarët që mbanin peshën e madhe të mungesave, teksa një pjesë e mirë e tyre pritet që të bashkohen në ditët në vijim.