Kamza leksion Vllaznisë, Dinamo thyen Besëlidhjen
Kamzalinjtë dhe blutë zgjohen pas disfatave në debutim
Në pallatin e sportit “Dhimitraq Go ga” janë zhvilluar dje ndeshjet e ditës së dytë të Kupës së Federatës në basketboll për meshkuj. Kryesfida e mbrëmjes ishte ajo e Grupit A, mes Vllaznisë dhe Kamzës, e cila përfundoi me fitoren e këtyre të fundit me shifrat 91-80. Ndërsa takimi i Grupit B, mes Dinamos dhe Besëlidhjes, u mbyll me suksesin e bluve në shifrat 9166. E gjithë vëmendja ishte te takimi mes Kamzës dhe Vllaznisë, pasi përballë njëratjetrës ishin dy ekipe me shumë investime dhe pretendime njëkohësisht. Kamza arriti të reagonte pas disfatës në debutim kundër Tiranës, duke marrë një sukses me meritë ndaj shkodranëve, teksa këta të fundit përveç pankinës kanë bërë shumë ndryshime edhe në përbërje. Fraksioni i parë i lojës është më i mirë për Vllazninë, e cila menjëherë shfaqet imponuese dhe fiton me 9 pikë diferencë 16-25. Kamza përgjigjet në periodën e dytë, duke u treguar shumë e organizuar dhe i kthen reston, teksa e fiton këtë fraksion loje 25-19. Edhe pse me një disavantazh të lehtë në pikë, Kamza edhe pas pushimit shfaq të njëjtën mënyrë loje. Ish-kapiteni i Goga Basket, Niko Thano, duket shumë shpejt i integruar me ekipin e ri dhe është pikërisht ai që prin me sukses sulmet e kamzalinjve. Nga ana tjetër, Shestani merr rolin e pikëshënuesit kryesor te Vllaznia. Sidoqoftë, shkodranët e trajnerit Nikola Milatoviç, edhe pse me shumë kualitete dhe eksperiencë në përbërje, nuk mundin t’ia dalin përballë një kundërshtari që luan i organizuar dhe me shumë dëshirë. Thano ishte shënuesi më i mirë i ndeshjes me 24 pikë, duke qenë vendimtar për skuadrën e Eni Llazanit. Ndërsa te Vllaznia më i miri ishte Shestani, autor i 23 pikëve. Në takimin tjetër kishim derbin e vogël të kryeqytetit ndërmjet Dinamos dhe Eagles, që në këtë sezon vijnë me emrin e ri, Besëlidhja. Blutë e drejtuar nga trajneri malazez Aleksandar Curoviç triumfuan bindshëm, në një takim ku e hipotekuan suksesin që në pjesën e parë, teksa shkuan në pushimin e madh me 23 pikë avantazh. Bega me 29 pikë ishte lojtari më i mirë i ndeshjes, duke udhëhequr Dinamon te suksesi. Ndërkohë, për të besuarit e trajnerit Klarent Dedaj, shkëlqeu Pylla me 21 pikë, por që mbetën vetëm për statistikë. Kupa e FSHB-SË do të zhvillojë sot takimet e ditës së tretë, të cilat janë edhe të fundit për fazën e grupeve ku dhe do të përcaktohen skuadrat finaliste. Në orën 17:00 do të luhet kryendeshja mes Vllaznisë dhe Tiranës, ndërsa në mbrëmje në orën 19:00 Partizani sfidon Besëlidhjen.