Vë shpirtin në fushë, Barela prova si kapiten i të ardhmes
Nikolo Barela është nga ata futbollistë që edhe tifozët kundërshtarë nuk mund ta urrejnë. Karakteri, jeta private, vazhdimësia, paketa e plotë teknike dhe psikofizike, e bëjnë italianin një mesfushor të një niveli superior.
PERSONAZHI – Historia ka treguar që ajo që ndihmon më shumë është mentaliteti. Barela ka lindur në Kaljari, është vetëm 24 vjeç dhe ka tashme tre fëmijë, për të cilët dedikohet ashtu si në fushë. Me bashkëshorten 7 vite më të madhe se ai ndajnë pasionin për basketbollin, për të cilin italiani në të shkuarën për pak hoqi dorë nga futbolli.
RËNDËSIA TEK EKIPI - Në 2019-ën Barela do të bënte transferimin që do t’i shënjonte karrierën dhe do ta niste me këmbën e duhur rrugëtimin e tij në dhomat e zhveshjes. Konte e shtynte përtej limiteve në stërvitjet në Apiano dhe sapo u përshtat me ritmin, sardi nuk diti të ndalej më. Maturim pësoi edhe temperamenti shpërthyes, që herë pas here e detyronte të merrte kartonë, ngjyra e të cilëve e vinte në rrezik lojën e skuadrës. Por vitin e kaluar numri u reduktua dhe Barela kapërceu vetëm “Kaljarin e tij” për shkak kartonësh. Nikolon e duan shumë edhe në dhomat e zhveshjes ku spikat marrëdhënia e tij me Brozoviçin, një tjetër gjaknxehtë, por që të dy kanë ditur të gjejnë gjuhën e përbashkët duke u etiketuar si B&B. Raport i ngrohtë edhe me të tjerët, ndaj jo më kot pas Handanoviçit, italiani është projektuar si kapiten.
NDIKIMI NË FUSHË - Tifozëve dhe Inzagit u intereson më shumë ajo që jep në fushën e lojës dhe aty Barela jep çdo gjë nga vetja. Mbron dhe kundërsulmon, pa e pasur problem faktin që duhet të mbulojë 70 metrat e kërkuara nga mënyra e re e lojës që karakterizohet nga kundërsulmet dhe pasimet e shkurtra. Barela di t’i lexojë momentet, të japë asiste dhe të driblojë si pakkush te zikaltrit. Me 5 asistet e tij ka treguar se nuk tradhton kurrë, edhe kur luan çdo tri ditë, edhe kur trajneri i ndërron rolin dhe e përdor në vend të Brozviçit, ose në të majtë kur aktivizohen Vidal ose Vesino. 24-vjeçari i shtrin tentakulat kudo.
KOMBËTARJA – Titullar fiks edhe me “Axurrët”, duke djegur konkurrencën dhe duke mos e vuajtur fare ndryshimin e skemës në 4-3-3 nga ana e Mançinit. Edhe pas ndonjë kritike në Europian, Barela iu përkushtua akoma më shumë punës, duke bërë gjithë “punën e pistë” tek italianët, në heshtje me modesti, pa harruar atë gol në çerekfinale kundër Belgjikës.