Çudit Barcelona, ka një skuadër më të shtrenjtë sesa Reali i Madridit dhe PSG

Edhe pse humbën Mesin, do të kushtonin sot në treg 896 milionë euro

Premier Liga vazhdon të ketë skuadrat më të kushtueshme në botë. Mançester Siti, Junajtid dhe Çelsi janë tri klubet me vlerën më të lartë të futbollistëve në rast se sot do të dilnin në treg për t’u shitur. Klasifikimin e klubeve më të shtrenjta për pesë kampionatet kryesore të Europës e ka bërë observatori zviceran i futbollit “CIES”. Nëse skuadra e Pep Guardiolës do të dilte sot në shitje, ajo do të kushtonte 1.280 miliardë euro. Siti dhe Junajtidi janë dy skuadrat që kanë shpenzuar më shumë për ndërtimin e tyre, por ato do të kthenin mbrapsht investimin në rast se do të dilnin në shitje. Për të gjetur skuadrën e parë spanjolle në klasifikimin e 98 klubeve, do të duhet të zbresim në vend të katërt. Çuditërisht nuk është Reali i Madridit, por Barcelona. Stafi i skuadrës së Ronald Kumanit ka një vlerë në merkato 896 milionë euro, pavarësisht se humbi edhe asetin e saj më të çmuar këtë verë, Lionel Mesin. Katalanasit renditen përpara rivalëve të Realit të Madridit, që pozicionohet në vend të 7-të, me stafin që i vlerësohet 846 milionë euro. Barça lë pas edhe PSG-NË. Francezët renditen në vend të tetë, 808 milionë euro. Dhjetëshen e parë të klasifikimit e mbyll Atletiko e Madridit, me një vlerë skuadre 662 milionë euro. Bajerni i Mynihut renditet në vend të pestë me 890 milionë euro dhe pas tyre Liverpuli (868 milionë euro). Brenda dhjetëshes së parë, edhe Borusia e Dortmundit (687 milionë euro). Për të gjetur skuadrën më të shtrenjtë italiane duhet të zbresim poshtë “top 10”. Juventusi kushton 618 milionë euro, ndërkohë që dy ekipet e Milanos renditen njëra pas tjetrës, respektivisht në vend të 17-të dhe 18-të. Kampionët e Italisë do të shiteshin në treg sot 469 milionë euro, ndërkohë që komshinjtë e tyre kuqezinj do të kushtonin 434 milionë euro. Skuadra më pak e kushtueshme e 5 kampionateve kryesore është Grojter Fyrthi (vetëm 26 milionë euro).