22-vjeçari makineri golash, shënon më shumë sesa Mane
Sigurimi i shërbimeve të Darvin Nunjezit i hap derën transferimit të Sadio Manesë drejt Bajernit të Mynihut. Bisedimet mes klubeve vazhdojnë, ndërsa deri tani Liverpuli ka refuzuar dy oferta të gjermanëve. “Reds”-at refuzuan pak ditë më parë një ofertë fillestare prej më shumë se 25 milionë eurosh (plus 5.5 milionë bonuset) për sulmuesin senegalez. Për 30-vjeçarin, i cili ka një kontratë deri në vitin 2023 në “Anfield”, kampionët e Gjermanisë bënë një ofertë të dytë këtë javë, duke e rritur atë në 27.5 milionë euro, plus 7.5 milionë bonuset. Por anglezët e quajtën qesharake duke qenë se bonuset përfshinin klauzola si fitimi 3 herë i “Topit të Artë” nga senegalezi dhe po kaq herë triumf në Champions. Tri vite është kontrata që i ofron Bajerni Manesë. Ajo do ta bënte sulmuesin 30-vjeçar një prej lojtarëve më të paguar të klubit me mbi 20 milionë euro në sezon. Por Liverpuli kërkon minimalisht 45 milionë euro, gjysmën e shifrës që do të paguajnë për transferimin e Nunjezit nga Benfika. Me largimin e Manesë Liverpuli do të humbasë jo pak gola duke ditur peshën e sulmuesit gjatë këtyre 6 viteve. Por Nunjez vjen me një bagazh golash edhe më të konsiderueshëm sesa Mane gjatë sezonit të fundit në kampionat. Vetëm 22 vjeç, uruguaiani shënoi 26 gola në 28 ndeshje të kampionatit portugez, ndërsa Mane 16 në 34 ndeshje. Nëse senegalezi realizoi gjysmë goli çdo ndeshje, Nunjez e kishte mesataren 1.2 gola për 90 minuta. Ai e goditi edhe më shumë portën, 3.9 herë krahasuar me 3.1 të Manesë. Por dha gjithashtu edhe më shumë asiste dhe krijoi më shumë raste. Roli i tij si sulmues qendre i shkon më shumë për shtat skuadrës së re të Liverpulit pas transferimit të Luis Diazit. Sepse me kolumbianin në skuadër, Mane u spostua shpesh nga e majta në qendër dhe tani nuk do të jetë më e nevojshme duke qenë se Nunjez luan më natyralisht në qendër të sulmit.