Thesar 100 mln euro, Milani merr Sançesin dhe tenton Raspadorin

Gjithçka mund të quhet e kryer tashmë, me përjashtim të vizitave dhe nënshkrimit që do të zhvillohen në fund të muajit, për Divok Origin, i cili do të mbërrijë në "Milanello" si transferim i lirë. Formulë e ndryshme për Jasin Adlinë që do t'i bashkohet gjithashtu ekipit të ri në fillim të korrikut. Sidoqoftë, kampionët e Italisë nuk kanë ndër mend të ndalen në merkato dhe synojnë të përmirësojnë repartin e sulmit të ekipit Stefano Piolit. Në kuadër të këtij aspekti, raporton "Sky", drejtuesit kuqezi takuan menaxherët e Xhakomo Raspadorit, të cili i skadon kontrata me Sasuolon në vitin 2024. Milani do të kishte shprehur interesimin e tij për 21-vjeçarin, por për momentin ende nuk është paraqitur asnjë ofertë për të në klubin zigjelbër. Për momentin, Maldini dhe Masara kanë një "thesar" prej 100 milionë eurosh me të cilin duhet të plotësojnë nevojat e Milanit për një mesfushor, një anësor ofensiv të djathtë, një fantazist dhe një sulmues. Sigurisht, ky i fundit nuk është diçka urgjente, por me një titull për të mbrojtur dhe me Champions-in ku do të tentohet tejkalimi i grupeve, Milani nuk mund t'i lërë në dorë asgjë rastësisë. Duke u rikthyer te Raspadori, Juvja mbetet rivali kryesor për shërbimet e të riut, pasi Interi ka vendosur të synojë Dibalën. Ai do të ishte një sulmues atipik për skemat e Piolit që rrallë herë ka luajtur pa pykë. Në rastin e 21vjeçarit të Sasuolos, do të ishte një alternativë në krah ose një 9 fals sipas nevojave të kuqezinjve.

GARANCIA SANÇES Mund të konsiderohet gjithçka e kryer për kalimin e Renato Sançesit te Milani. Në orët e fundit është arritur një marrëveshje totale mes klubit kuqezi dhe mesfushorit të lindur në vitin 1997, i cili do të paguhet 3 milionë plus bonuse gjatë përvojës së tij të re në fanellën e "Djallit". Sipas "Corriere dello Sport", 18-20 milionë euro do të jetë shuma që do të derdhet në arkat e Lilës, teksa zyrtarizimi i operacionit mund të shtyhet për në korrik kur lojtari të prezantohet e t'i bashkohet menjëherë grupit të Stefano Piolit që do të nisë përgatitjet sezonale më 4 korrik në "Milanello". Sançes do të marrë në organikë vendin e lënë bosh nga largimi i Frenk Kesit që preferoi Barcelonën pavarësisht se i kishte premtuar besnikëri Milanit gjatë Olimpiadës. Sa i përket portugezit, ai ka përvojë ndërkombëtare falë paraqitjeve me Portugalinë dhe në Champions me Bajernin.