Shqipëria nuk ndez, Izraeli na... përmbys
Kombëtarja me dy fytyra, Solomon zhvlerëson Brojën Shthurje në pjesën e dytë, s’mbajmë dot as barazimin
“Dhuratat” vazh dojnë! Shqipëria përmbyset 1-2 nga Izraeli dhe shpërdoron një rast të artë për të likuiduar rivalin direkt në Grupin 2 eliminator të Ligës (B) së Kombeve. Një Kombëtare me dy fytyra, që bën një pjesë të parë të admirueshme, duke kërkuar golin me ngulm dhe ia del, e më pas në 45-minutëshin e dytë, shthuret totalisht. Izraeli meritoi gjithçka në Tiranë, në një ndeshje ku kuqezinjtë “mallkojnë” edhe sistemin VAR, teksa u anulua një penallti, por edhe një gol i Elseid Hysajt. Dy ndeshje dhe vetëm një pikë, e për më tepër në një grup ku në total janë tri skuadra (Rusia është skualifikuar), është shumë pak për Shqipërinë në këtë start, aq më shumë kur synohet kreu. Pjesa e dytë tregoi se nuk jemi ende një ekip kompakt, në një kohë që Izraeli na kapi “mat” disa herë përmes kundërsulmeve, ku Solomon me dopietën e tij bëri heroin, por Berishës i erdhi edhe shtylla në ndihmë, pasi ndeshja mund të kishte përfunduar me humbje më të thellë. Trajneri Edi Reja, në krahasim me ndeshjen e parë në transfertë ndaj Islandës, dje kishte bërë pesë lëvizje në formacion. Në stol kishte lënë Kumbullën, Gjasulën, Çekiçin dhe Seferin, ndërsa Cikalleshi mungonte për shkak të problemeve shëndetësore. Veseli, Asllani, Bajrami dhe dyshja e sulmit Broja-uzuni ishin zëvendësuesit e tyre.
PJESA E PARË
Shqipëria kërkon ta nisë me vrullin e zakonshëm kur luan në shtëpi dhe deri diku ia del falë presionit që bën në sulm veçanërisht Uzuni, i cili është protagonist në 20 minutat e para. Duelet e tij me mbrojtësin e Izraelit, Miguel Vitor, janë më pikantet e pjesës së parë. Sulmuesi beratas fiton një penallti, por është i pafat, pasi arbitri e anulon pasi shikon pamjet filmike. Kuqezinjtë shtojnë presionin dhe kërkojnë të shfrytëzojnë në maksimum goditjet standarde të ekzekutuara nga Bajrami, por tentativat e Gjimshitit dhe Ismajlit me kokë nuk bëjnë dëm në portën izraelite. Pas gjysmë ore lojë në skenë del Broja dhe driblimet e tij dehëse në krahun e majtë ngrenë peshë stadiumin. Fillimisht sulmuesit
i mohon golin portieri Marsiano, ndërsa në fundin e kësaj pjese, Balliu fiton një penallti dhe Broja godet në mënyrë perfekte, duke çuar ekipin në pushim me shifrat 1-0.
PJESA E DYTË
Reja nuk bën asnjë ndryshim, por kolegu i tij izraelit,
Alon Hazan, godet me aktivizimin e Safurit. Ky i fundit bën lëmsh kuqezinjtë me lëvizjet e tij nga krahët dhe veçanërisht goditjet nga distanca. Pasi na shpëton një herë Berisha, goli i Izraelit nuk vonon dhe vjen si një rrjedhë logjike e një insistimi që kundërshtari bën për të barazuar shifrat. Por, ajo që bën më tepër përshtypje është fakti se sulmuesi Solomon krijon hapësira të frikshme në krahun e majtë, duke shënuar një gol mjaft të bukur pas driblimit në zonë të Gjimshitit. Pas minutës së 60-të Shqipëria është totalisht e përgjumur, duke pësuar një shthurje të pashpjegueshme. Izraeli merr zemër dhe i afrohet golit me Safurin dhe Jaberin, derisa thërritet sërish në apel Solomon, për të përmbysur rezultatin. Sulmuesi më i mirë izraelit përfiton nga një vendosje e gabuar e mbrojtjes kuqezi. Reja largon njërin pas tjetrit Asllanin dhe
Bajramin, duke forcuar mesfushën me Ramadanin e Gjasulën. Kombëtarja kërkon me ngulm barazimin dhe Balliu është i pafat pas një asisti që merr nga Abrashi. Shqipëria arrin të shënojë me Hysajn, por goli anulohet për pozicion jashtë loje. Gjashtë minuta para fundit aktivizohen edhe Çekiçi, Balaj e Vrioni, por asgjë nuk ndryshon, madje jemi me fat që nuk pësojmë golin e tretë. Sulmuesi i aktivizuar si zëvendësues tek Izraeli, Dabur, goditi shtyllën dhe iu afrua në dy raste golit, por gjithçka u mbyll 1-2 edhe pas 6 minutave shtesë.