Laçi shtyn stërvitjen, Duro gjithnjë e më larg
Kurbinasit pritet të zbresin sot për herë të parë në fushë, trajneri është thuajse i ikur
Laçi duhet të zbriste dje në fushë për të nisur përgatitjet për Ligën e Konferencës, por kjo nuk ka ndodhur. Duke qenë se ekipi në grumbullimin e bërë në kryeqytet ka pasur pak lojtarë në dispozicion, pasi të huajt nuk kanë mbërritur ende në Shqipëri, klubi ka vendosur që stërvitja e parë të zhvillohet sot. Laçi mëson rivalin më 14 qershor, kur UEFA do të hedhë shortin në Nion të Zvicrës. Ndeshjet e para të turit të parë të Ligës së Konferencës do të luhen më 7 korrik, ndërsa ato të kthimit më 14 korrik. Ndërkohë, krahas largimeve të lojtarëve të rëndësishëm si Aleksandar Ignjatoviç, Ardit Deliu, Juljan Shehu, Bashkim Velija dhe Alen Sherri, ajo që shqetëson më shumë në kampin kurbinas është çështja e trajnerit. Duket se mes palëve ka një ngërç dhe gjasat më të mëdha janë që Shpëtim Duro dhe ndihmësi i tij, Sero Noka, të mos paraqiten në stërvitjen e sotme. Nuk dihet ende se cili është vendimi i klubit për stafin teknik, por kjo do të sqarohet në orët në vijim. Kujtojmë se pa u mbyllur ende sezoni 20212022, Laçi zyrtarizoi rinovimin e kontratës me Duron. Pak ditë më parë doli në skenë edhe Shkëndija e Tetovës për interesimin që ka pasur për afrimin e trajnerit 62-vjeçar. Gjithsesi, mes drejtuesve kurbinas dhe Duros ka një çështje tjetër që mban peng situatën, por palët hezitojnë ta zbardhin publikisht. Për momentin nga ana e klubit kurbinas nuk është zyrtarizuar ndonjë afrim në merkato, por pa u zgjidhur çështja e trajnerit, zor se mund të ketë zhvillime në merkato. Gjithsesi, drejtuesit kanë kohë që negociojnë me lojtarë të cilët duan t’i ofrojnë në ekip për të kompensuar pesë largimet e deritanishme. Një “bingo” e madhe për klubin është rinovimi i kontratës me golashënuesin më të mirë të kampionatit të fundit, Saliu Guindo. Më parë kanë zgjatur marrëveshjen edhe portieri Dajsinani dhe mbrojtësi Turkaj.