Rishfaqet dopingu në shtangë, Ismailanj pozitiv
24-vjeçari konkurroi edhe në Kampionatin Europian U kap me substanca të ndaluara në kontrollin e FSHP-SË
Rishfaqen hijet e dopingut në pesh ëngritjen shqiptare. Herlsjon Ismailanj ka rezultuar pozitiv në testin që ka bërë Federata Shqiptare e Peshëngritjes para Kampionatit Europian që u mbajt në Tiranë. Lajmin e ka konfirmuar edhe vetë FSHP për “Panorama Sport”, teksa drejtuesit e shtangës bëjnë me dije se bëhet fjalë vetëm për testin e parë dhe se sportisti do të mbërrijë në Tiranë në orët e ardhshme për t’iu nënshtruar edhe testit B. Ismailanj konkurroi në Europian në kategorinë e peshave 67 kg, por pa lënë shumë gjurmë në këtë aktivitet, teksa u rendit i dhjeti në stilin e shkëputjes me 118 kg, i teti në stilin e shtytjes me 145 kg dhe i nënti në dygarësh me 263 kg. Ismailanj është pjesë e
skuadrës së Tiranës, por 24vjeçari jeton dhe stërvitet në Greqi. Vetëm disa muaj më parë ai u shpall edhe kampion në peshën e tij në Kampionatin Kombëtar që u mbajt në Parkun Olimpik. Siç dihet, prej gati 4 vitesh, duke marrë
shkas nga rastet e shumta që kanë njollosur shtangën në të shkuarën, Federata Shqiptare e Peshëngritjes ka nisur t’i aplikojë edhe brenda vendit kontrollet antidoping, me qëllim për parandalimin e përdorimit të substancave të ndaluara. Në muajin maj, para Kampionatit Europian, ekipi kombëtar iu nënshtrua kontrolleve antidoping, ndërsa federata njofton se të gjithë peshëngritësit kanë rezultuar negativ, me përjashtim të sportistit Herlsjon Ismailanj. Ky i fundit pritet në orët e ardhshme që të vijë në Tiranë për t’iu nënshtruar kontrollit të dytë. Në rast se edhe testi B do të rezultojë pozitiv, atëherë priten masa të forta ndaj sportistit, i cili rrezikon përjashtimin përjetë nga peshëngritja. Dopingu në sport mbetet një fenomen global që ka njollosur edhe shtete superfuqi botërore. Mjafton të kujtojmë përjashtimin e Rusisë, pasi u zbulua një megaskandal me përdorimin e substancave të ndaluara, për të cilin u akuzua edhe qeveria ruse, e cila shihej si sponsorizuese e mashtrimit, që kishte për qëllim arritjen e rezultateve të larta sportive.