Kastrioti konfirmon trajnerin, Çela: Ja projekti i ri i ekipit

Kastrioti i sezonit të ri do të vazhdojë rrugën aty ku përfundoi edicioni i fundit. Emiljano Çela është konfirmuar në krye të Kastriotit edhe për sezonin e ri futbollistik. Kjo ka ardhur pas një takimi me presidentin Alban Vogli të shtunën, ku krahas konfirmimit të teknikut edhe për një sezon, janë diskutuar edhe mjaft çështje të tjera që kanë të bëjnë me skuadrën dhe kryesisht merkaton e verës. Lajmin e ka konfirmuar edhe vetë trajneri Emiljano Çela, i cili për “Panorama Sport” u shpreh: “Është e vërtetë që jam konfirmuar në krye të Kastriotit. Kemi rënë dakord me presidentin për ta vazhduar bashkëpunimin edhe për një sezon tjetër. Një nga pikat e dakordësuara ka qenë ajo që unë e kam shprehur edhe më parë, ruajtjen e grupit aktual. Normalisht, një pjese të lojtarëve i ka përfunduar kontrata, por ne u kemi bërë ofertë për të rinovuar dhe presim konfirmimin e tyre. Do t’i presim deri më 4 korrik, datë në të cilën ne kemi vendosur edhe për nisjen e përgatitjeve për sezonin e ri”. I pyetur për projektin e ri të Kastriotit dhe çfarë synojnë krutanët në këtë merkato, trajneri Çela deklaroi: “Projekti do të vazhdojë dhe do të synohet gjithnjë përmirësim nga sezoni në sezon. Sigurisht që duhet shumë punë dhe përkushtim. Për t’i pasur këto duhet të funksionojnë të gjitha hallkat. Për sa i përket skuadrës së re, siç e thashë më sipër, do të tentojmë të ruajmë grupin. Sigurisht që firot mund të ketë, por do të mundohemi t’i zëvendësojmë me lojtarë të mirë”. Shumë emra janë lakuar si largime të mundshme nga radhët e Kastriotit pas përfundimit të sezonit, por klubi ende nuk ka bërë asnjë zyrtare, pasi po bisedohet për ruajtjen e grupit. Kaina Nunesh, sulmuesi brazilian, që erdhi i huazuar nga Vllaznia në janar, mund të quhet zyrtarisht i larguar. Vetë sulmuesi brazilian e ka konfirmuar për “Panorama Sport” se është larguar nga zyrtarisht nga Kastrioti. Parimisht të larguar konsiderohen edhe Jusuf Zetuna, Henri Okebuku, Spartak Ajazi dhe Bedri Greca, ndonëse këtij të fundit i është ofruar rinovimi.