Çelhaka: Idrizi është shefi, por as e kam menduar të ndërroj ekip

Mesfushori e pret edhe një vit në Vlorë

Asnjë nga lojtarët që mbylli sezonin në Vlorë nuk është rikonfirmuar. Te Flamurtari janë të gjithë në “ajër” dhe në pritje të një telefonate nga klubi. Paralajmërimi që ka dhënë disa herë administratori Sinan Idrizi ka shtuar pasigurinë te gjithkush. Por ka nga ata që janë të sigurt se do të qëndrojnë të paktën edhe një vit te Flamurtari. Mes tyre është edhe Alked Çelhaka. Në një intervistë për “Panorama Sport”, mesfushori shpreh dëshirën që të mbetet kuqezi.

Alked, me çfarë po merreni në këtë periudhë pushimi?

Në fakt ende jemi me pushime, por natyrisht që po stërvitemi. Jam duke punuar individualisht. Ne futbollistët e kemi profesionin të atillë, që nuk mund të pushojmë si të tjerët. Na duhet të ruajmë formën, pasi rrezikojmë shumë. Por, besoj se edhe pushimeve po i vjen fundi dhe do të fokusohemi tani për atë që duhet të bëjmë për sezonin e ardhshëm.

Ju kanë kontaktuar nga klubi për të ardhmen?

Vetëm ne lojtarët me njëri-tjetrin. Me drejtuesit e klubit gjatë kësaj kohe nuk është se kemi pasur ndonjë kontakt.

Do të qëndroni te Flamurtari këtë sezon?

Dëshira ime është që të vazhdoj me Flamurtarin. Nuk e kam çuar nëpër mend që të ndryshoj ekip. Dua të jem pjesë e kësaj skuadre për ta çuar aty ku e meriton. Besoj se në ditët në vazhdim do të kontaktojmë edhe me drejtuesit. Duke pasur parasysh korrektësinë dhe zemërgjerësinë e presidentit dhe duke besuar në projektin për ngritjen e Flamurtarit, dëshira është për të vazhduar më tej sigurisht.

Idrizi është shprehur se asnjë nuk e ka vendin të sigurt, si e komentoni?

Idrizi është shefi dhe ai bashkë me stafin e tij e dinë më mirë se si duhet të jetë Flamurtari i këtij sezoni. Kështu që, nuk mund të hyj në këto detaje. Unë shikoj vetëm që të bëj më të mirën dhe të jap maksimumin në këtë skuadër për arritjen e objektivave.

Kur mendoni se do ta shohim në Superiore Flamurtarin?

Ngjitja në Superiore është një dhuratë që na takon ne futbollistëve për të gjithë Vlorën në 100-vjetorin e themelimit të klubit. Jam i bindur se me këtë projekt të presidentit do të arrijmë ta bëjmë realitet. Në këto kushte duhet që të bëjmë maksimumin të gjithë bashkë për ta çuar Flamurtarin aty ku e ka vendin.