Formacion me 29 sportistë, Shqipëria gati për Mesdhetaret
Kombëtarja, mision medaljet në Algjeri Shtanga dhe atletika, me pritshmëritë më të larta
Nga data 25 qershor deri më 45 korrik në Oran të Algjerisë do të mbahen Lojërat Mesdhetare 2022, një eveniment sportiv në të cilin do të marrin pjesë 26 shtete. Ky është edicioni i 19-të i Lojërave Mesdhetare, të cilat ishin planifikuar për t’u zhvilluar verën e kaluar, por u spostuan me një vit për shkak të shtyrjes së Olimpiadës. Plot 3390 sportistë do të konkurrojnë në 24 sporte të ndryshme, individuale dhe ekipore. Në “Oran 2022” do të jetë e pranishme edhe Shqipëria, e cila shkon me ambicie në Algjeri, ku synon edhe medalje në disa sporte. Kombëtarja Kuqezi do të zbarkojë në këto Mesdhetare me një ekip të përbërë nga 29 sportistë në 10 sporte të ndryshme.
PESHËNGRITJA - Si gjithnjë pritshmëritë më të larta vijnë nga peshëngritja, teksa Shqipëria e shtangës do të ketë një formacion luksi, të udhëhequr nga Briken Calja, Evangjelia Veli apo Erkand Qerimaj, sportistë të cilët janë një garanci absolute për medalje.
Calja kërkon të fshijë menjëherë atë ditë të keqe të Europianit,
ndërsa Veli e Qerimaj vijnë me moral shumë të lartë pas medaljeve të arta të fituara në kompeticionin më të rëndësishëm kontinental që u mbajt pak ditë më parë në Tiranë. Ekipi i peshëngritjes do të plotësohet nga Albert Meta dhe Mateus Caci.
ATLETIKA – Kur flitet për “mbretëreshën e sporteve” në vendin tonë nuk ka se si të mos e lidhësh atë me emrin e Luiza Gegës. Dimensioni i 33vjeçares është Botëror apo Europian dhe sigurisht që në Algjeri mbetet favoritja kryesore për ta fituar medaljen e artë, ashtu sikurse bëri në edicionin e kaluar në Tarragona. Luiza po kalon një moment të artë, teksa vetëm pak ditë më parë theu rekordin kombëtar në një event të mbajtur në Holandë dhe ndoshta në Oran do të jetë radha për një tjetër rezultat mbresëlënës. Atletika kuqezi do të përfaqësohet gjithashtu në Mesdhetare edhe nga Franko Burraj, një tjetër sportist me pritshmëri të larta, ndërsa keqardhja e vetme është mungesa e Izmir Smajlajt, i cili është fazën e rikuperimit pas operacionit në gju që iu nënshtrua disa javë më parë.
MUNDJA – Pak muaj më parë Federata Shqiptare e Mundjes bëri një lëvizje duke natyralizuar me pasaportë shqiptare dy sportistë çeçenë si Zelimkhan Abakarov dhe Islam Dudaev. Kjo strategji solli menjëherë edhe rezultatet e para, duke i dhënë medalje Shqipërisë në evente të rëndësishme europiane. Nga Dudaev dhe Abakharov janë edhe pritshmëritë më të larta të mundjes sonë në Mesdhetare, por pa harruar as sportistët e tjerë të talentuar si Osman Hajdari, Bajram Sina, Gjetë Prenga dhe Kevin Kupi.
BOKSI – Shqipëria e boksit udhëton me një skuadër të përbërë nga pesë boksierë. Alban Beqiri do të ngjitet në ring nën petkun e medalistit botëror, ndërsa shumë të karikuar për të lënë gjurmë janë gjithashtu edhe Ardit Murja, Arjon Kajoshi apo Nelson Hysa. Sporti i dorezave, si gjithnjë premton luftë të fortë në ring.
SPORTET E TJERA – Shqipëria kërkon zonën e medaljeve gjithashtu edhe në gjimnastikë arstistike, sport ku do të përfaqësohet nga Matvei Petrov. Rusi i natyralizuar synon suksesin e radhës nën flamurin tonë kombëtar. Në xhudo, Indrit Çullhaj, pas triumfeve në rang ballkanik, kërkon që të arrijë në një tjetër dimension. Shqipëria e xhudos do të përbëhet gjithashtu edhe nga një tjetër sportist premtues, siç është Erson Ramaj. Në taekwondo do të jetë Jurido Cani, ai që do të përfaqësojë vendin, pas disa rezultateve shumë të mira të arritura në eventet e fundit ndërkombëtare. Kombëtarja e tenisit do të formohet nga vajza e talentuar shkodrane, Gresi Bajri, kampione në Europianin e moshave. Një tjetër teniste e talentuar pjesëmarrëse në Oran është edhe Kristal Dule, e cila së bashku me Martin Muedinin do të formojnë ekipin e tenisit. Qitja kuqezi për në “Oran 2022” përbëhet nga dyshja Kristina Anxhara dhe Manjola Konini. Ndërsa ekipi i notit formohet nga Frenki Vogli, Drini Ujkashej dhe Sara Dande, ndërsa bie në sy mungesa e Nikol Merizajt, kampione absolute dhe rekordmene e notit shqiptar.