Stojku “bekon” katër afrimet: Nuk kemi mbaruar me merkaton

Akademia e Futbollit Elbasani është ndër të paktat ekipe të Kategorisë së Dytë që e ka nisur shpejt merkaton. U bënë ditë që në klub kanë zyrtarizuar një pjesë të mirë të skuadrës, duke hedhur baza të forta për sezonin 2022-2023. Te verdheblutë janë rikonfirmuar disa nga titullarët e vjetshëm dhe janë bashkuar katër lojtarë: Kasa, Koçi, Broshka dhe Sejdini. Në një prononcim për “Panorama Sport”, trajneri Gentian Stojku jep “bekimin” për përforcimet që janë bërë. E megjithatë, pohon se nuk do të ndalen me kaq. Ai e pret edhe “qershinë mbi tortë” deri në nisje të kampionatit. “Deri më tani jemi munduar të tregohemi të kujdesshëm me afrimet. Kemi synuar vetëm lojtarë që i shohim të vlefshëm për të çuar para projektin që kemi nisur. Me një pjesë të mirë të grupit të sezonit të kaluar kemi mbyllur marrëveshjet dhe jemi në rrugë të mbarë për sa i përket sezonit të ri. Merkatoja është ende e hapur dhe do ndërhyjmë aty ku kemi më shumë nevojë, por deri në fund e pres edhe një lojtar tjetër, e thënë ndryshe ‘qershinë mbi tortë’. Në ditët e para të muajit korrik kemi menduar të nisim edhe përgatitjet”, u shpreh fillimisht tekniku i elbasanasve, në një deklaratë të dhënë enkas për “Panorama Sport”.

OBJEKTIVI - Në lidhje me objektivin e ngjitjes, ai e sheh si plotësisht të mundur, por e ka të qartë se Kategoria e Dytë nuk është aq e lehtë sa e Treta, ndaj duhet shumë punë. “Objektivat tanë janë të qartë dhe është thënë që në fillim të krijimit të këtij klubi se vit pas viti duam ngjitjen një kategori më lart. E Dyta normalisht do të jetë akoma më e vështirë se e Treta, ndaj po bëjmë ndërhyrje që të mos e vëmë në diskutim objektivin. E meriton ky qytet dhe kjo tifozëri që të ketë ekipin në nivelet më të larta të futbollit, ndaj do bëjmë të gjithë maksimumin për të arritur më të mirën”, u shpreh në prononcimin e tij për gazetën Gentian Stojku. Sezonin e kaluar AF Elbasani mori pjesë në Kategorinë e Tretë dhe ia doli të shpallej kampion me të gjitha fitore dhe vetëm një barazim. Që nga koha e krijimit, kjo skuadër nuk e ka provuar asnjëherë shijen e humbjes, ndërsa është sërish para rivalëve të tjerë sa i përket organizimit për këtë sezon.